Ազգային ժողովում մարտի մեկի հարցերն ուսումնասիրող հանձնաժողով ստեղծելու ՀԱԿ առաջարկի քննարկման ժամանակ ԱԺ պատգամավոր Ալեքսանդր Արզումանյանը հիմնական զեկուցող Գագիկ Ջհանգիրյանը մտահոգություն հայտնեց,թե ժամանակի առումով, թե քանի որ չի տեսնում որևէ նախադրյալ, որ մեծամասնության տեսակետում ինչ-որ փոփոխություն կլինի, հետևաբար նույն փոցխի վրա երկրորդ անգամ կանգնելու ընդդիմության փորձն անհասկանալի է, բայց հաշվի առնելով, որ սա առիթ է որոշ հարցերի բարձրաձայնման համար, նշեց.
«Փաստահավաք խմբի զեկույցներից մեկում հաստատվել է, որ եղել են ապօրինի զինված խմբեր, դրանց որևէ բացատրություն չի եղել, եղել են նաև պատվերով սպանություններ: Մամուլում ՊՆ գաղտնի հրամանի պատճենն է հրապարակվել, դրան ևս որևէ արձագանք չի եղել, որևէ մեկը պատասխանատվության չի ենթարկվել, ինչո՞ւ»:
Հիմնական զեկուցող, ՀԱԿ խմբակցության պատգամավոր Գագիկ Ջհանգիրյանը նշեց, որ եթե մարտի մեկին չլինեին այս դեպքերը, ասենք լինեին դեկտեմբերի մեկին, իրենք դրա նախօրյակին էին նախաձեռնելու նման հանձնաժողովի ստեղծումը: «Ես բարոյական պատասխանատվություն ունեմ զոհվածների իրավահաջորդների առաջ, ուզում եմ հեռացնել քաղաքական քննարկումների դաշտից, սակայն այն անընդհատ բերվում է քաղաքական դաշտ: Ապօրինի զինված խմբավորումների վերաբերյալ փաստահավաք խմբի զեկույցի մասին… մեղմ է ասել, որ ես ծանոթ եմ այդ զեկույցին, գիտեմ, որ այնտեղ որոշակի տեղեկատվություն է ներկայացված, որ այդ օրը որոշ անձանց ՊՆ հանդերձանքի պահեստից հատկացվել են հագուստներ ինչ-որ քանակությամբ՝ դաշտային հագուստներ,հետևաբար սպառազինության պահեստից էլ զենք-զինամթերք է հատկացվել»,- ասաց նա՝ ցավով նշելով, որ փաստահավաքի փորձերը՝ հանդերձանքի պահեստում ուսումնասիրել այդ համազգեստների տրամադրման հարցը, ձախողման ենթարկվեցին:
Ջհանգիրյանը նշեց՝ փաստերը չի ասում՝ հաստատված են, բայց պետք է ստուգվեն, նախապես հաստատված որևէ պնդում չի անում, բայց կարծում է՝ դրանք պետք է քննության ճանապարհով ստուգվեն: «Ինչ վերաբերում է ՊՆ հրամանին՝ Դուք երևի վստահ եք, որ ես այդպիսի բազմաթիվ հրամանների ծանոթ եմ, մի շարք նման հրամանների մշակմանը մասնակից եմ, այդ հրամանի երեք-չորս կետից կարող եմ եզրակացնել, թե մնացածն ինչ է գրված, բայց ցավոք սրտի՝ հրամանից հրապարակված է միայն վերնագիրը և մեկ-երկու կետ, սակայն ակնհայտ է՝ այն ապօրինի է, հենված չէ որևէ իրավական նորմի վրա. նախաբանում նշված չէ՝ ՍԴ այսինչ հոդված, Կառավարության այսինչ որոշում և այլն»,- ասաց նա:
Ջհանգիրյանը նաև նշեց՝ նախագծում իրենք խիստ զգուշավոր ձևակերպում են տվել՝ մարտիմեկյան դեպքերին պետական կառույցների , պաշտոնյաների հնարավոր առնչության կամ մասնակցության հարց:
ԱԺ ՀՀԿ խմբակցության պատգամավոր Մարգարիտ Եսայանը, խոսքն ուղղելով հիմնական զեկուցողին, նշեց, որ որևէ մեկը, ես ավելի շատ հենց ինքը, չեն կասկածում Ջհանգիրյանի հռետորաբանական, իրավաբանական ունակությունների վրա, ինչին ՀԱԿ պատգամավորը արձագանքեց՝ «Սկզբից իրավաբանականը պիտի ասեիք», Եսայանն էլ նշեց. «Դուք հիմա դա ավելորդ անգամ ապացուցեցիք: Այս վիճակը, կարծում եմ, Ձեզ պիտի բավարարի, դուք հարցերին պատասխանում եք երկար ու խիստ, դա շատ հաճելի է, ես չեմ բողոքում, դուք կարծեք սկսել եք ձեր աշխատանքը, սակայն Ձեր խոսքում հակասեցիք ինքներդ ձեզ՝ ասում էիք՝ հանձնաժողովի խնդիրն է գնահատական տալ, իսկ հիմա ասում եք՝ երբեք հանձնաժողովի խնդիրը չէ գնահատական տալ»: Ջհանգիրյանը Եսայանին հակադարձեց. «Տարբեր մարդիկ տարբեր բաներից են բավարարվում, նախասիրությունների հարց է, ես երկար-բարակ ելույթ ունենալուց բավականություն չեմ ստանում, իսկ գնահատական տերմինով անվանակոչվածը եզրակացություն է՝ ներկայացնելու համար ԱԺ-ին, մեր գնահատականն իրավական չէ, ուստի որևէ հակասություն չեմ տեսնում այստեղ»:
ՀՀԿ-ական պատգամավորը նշեց, որ նրբանկատորեն չի ուզում անդրադառնալ Ջհանգիրյանի ռեպլիկին՝ բավարարվել-չբավարարվելու մասին, թողնում է նրա ճաշակին, սակայն դեմ է այս հանձնաժողովի ստեղծմանը, ապա ընդգծեց՝ Ջհանգիրյանը նշում է՝ ուզում են, որ գործը տեղից շարժվի, ծանոթ լինելով ԱԺ կանոնակարգին և ժամանակավոր հանձնաժողովների լիազորություններին ու գործառույթներին, ինչպես է պատկերացնում հետագայում գործը տեղից շարժվելը: ՀԱԿ պատգամավորը նշեց, որ այդ իսկ պատճառով իրենք ակնկալում են ողջ ԱԺ-ի, հատկապես քաղաքական մեծամասնության աջակցություւնը, որովհետև հանձնաժողովն ինչ հետևությունների էլ հանգի, դրանք որոշ ճանապարհով որպես հանձնարարականներ պիտի իջեցվեն համապատասխան մարմիններին:
«Այս աջակցության տակ ես հասկանում եմ, որ եթե հանձնաժողովը ստեղծվի, կարողանա մեր առջև դրված խնդիրների ինչ-որ մասը գոնե ներկայացնի ԱԺ-ին, ապա այն պարտավոր է այդ խնդիրները բարձրացնել նախագահի առաջ և միջնորդել, որ համապատասխան հանձնարարականներ ուղարկվեն գլխավոր դատախազությանը. հո մենք օպերատիվ-հետախուզական մարմնի աշխատակի՞ց չենք, որ գնանք մեկի թևը բռնենք: Ես լավ գիտեմ լիազորությունները, բայց նաև լավ հասկանում եմ՝ երբ քաղաքական մեծամասնությունը կամք է դրսևորում, ինչ ճանապարհով կարելի է դա անել, ես այդ լծակները, ճանապարհները շատ լավ գիտեմ»,- ասաց նա:
