Վարչապետ Նիկոլ Փաշինյանն ապրիլի 9-ին ավտոմաքսատուն այցի ընթացքում պատասխանելով լրագրողների հարցերին՝ անդրադարձել է նաև Ազգային ժողովում հայտնի ելույթից հետո աղմուկին: Խոսքը տրանսգենդերի ելույթի մասին է, որից հետո առաջացել են բավականին թեժ հասարակական-քաղաքական քննարկում կամ բանավեճ, բողոքի ակցիաներ, որոնց հեղինակները գործող իշխանությանը մեղադրում են ազգային արժեքների դեմ քաղաքականության համար:
Վարչապետը փաստացի հայտարարել է, որ տեղի ունեցածը սադրանք էր հեղափոխության ու կառավարության դեմ, որի համար գործնականում պատասխանատու է դիտարկել Մարդու իրավունքների հարցերով հանձնաժողովի նախագահ Նաիրա Զոհրաբյանին, որը ԲՀԿ խմբակցության քարտուղարն է: Նիկոլ Փաշինյանը հայտարարել է, որ նրա ստորագրությամբ են բոլոր մասնակիցները անցել խորհրդարան:
Փաշինյանը նաև հակադարձել է ՀՀԿ-ականների քննադատությանը՝ ասելով, որ հենց ՀՀԿ իշխանությունն է Հայաստանի քաղաքացի Վաղարշակ Մարտիրոսյանին տվել նոր անձնագիր՝ Լիլիթ Մարտիրոսյան անուն-ազգանունով, ընդ որում՝ անձնագրում սեռը նշելով արական: Վարչապետը նաև հայտարարել է, թե ԲՀԿ-ն պետք է մտածի՝ արդյոք Նաիրա Զոհրաբյանը համապատասխանո՞ւմ է Մարդու իրավունքների հարցերով հանձնաժողովի նախագահի պաշտոնին:
Այդպիսով, երկօրյա աղմուկից հետո իշխանությունը բարձր մակարդակով անցավ հակագրոհի, և, դատելով վարչապետ Փաշինյանի գնահատականից, նա հայտարարեց ՀՀԿ-ԲՀԿ նույնացման մասին, առնվազն տվյալ դրվագում: Որովհետև վարչապետը բավականին պարզորոշ կերպով իրավիճակի պատասխանատվությունը դրեց ԲՀԿ, առնվազն ԲՀԿ խմբակցության քարտուղարի՝ հանձնաժողովի նախագահ Զոհրաբյանի վրա: Միաժամանակ, եթե նա համարում է, որ դա սադրանք է հեղափոխության ու կառավարության դեմ, և ակնարկում է այդ սադրանքից ՀՀԿ օգտվելու փորձի մասին, դա նշանակում է, որ անուղղակի մեղադրանք կամ ակնարկ է հնչում, որ ԲՀԿ-ն ու ՀՀԿ-ն գործել են համակարգված կամ, այսպես ասած, «փոխանցումներով»:
Մյուս կողմից՝ Փաշինյանը կարծես թե ակնարկում է ԲՀԿ ղեկավարությանը, որ եթե կուսակցական մակարդակով չէ սադրանքը, ապա դա պետք է բերի նրան, որ կուսակցությունը քաղաքական վերաբերմունք դրսևորի Նաիրա Զոհրաբյանի նկատմամբ, այլապես մասնակից է «սադրանքին»՝ ինչպես բնորոշում է Նիկոլ Փաշինյանը:
ԲՀԿ նախագահ Գագիկ Ծառուկյանը նախօրեին հայտարարել էր, որ Նաիրա Զոհրաբյանն ամեն ինչ ճիշտ է արել: Նիկոլ Փաշինյանը փաստորեն նրան հակադրում է քաղաքական կոշտ գնահատական: Կգնա՞ ԲՀԿ-ն դիմակայության խորացման: Նիկոլ Փաշինյանը պարզորոշ ցույց տվեց, որ այդ դեպքում իշխանության մարտավարությունը լինելու է ԲՀԿ շարունակվող նույնացումը նախկին իշխանության, իշխող համակարգի հետ: Այդ գործում հաջողության կամ արդյունավետության համար իշխանությանն անկասկած մեծ ջանք պետք չի լինի:
Փաշինյանը փաստորեն Ծառուկյանին դնում է կամ-կամ-ի առաջ, որտեղ նրա ընտրությունը թերևս լինելու է վատի և վատթարի միջև: Ստեղծված իրավիճակում ԲՀԿ նախագահը քաղաքական առումով չունի լավ ընտրություն:
