Եվրոպայի անշարժ գույքի գործակալությունները և տրանսպորտային ընկերություններն, ինչպես նաև Deutsche Bank-ը և Financial Times թերթի հրատարակիչը փաստորեն բոյկոտ են հայտարարել Բրունեյի սուլթանին՝ բողոքելով այդ երկրում քարկոծման միջոցով մահապատժի սահանման դեմ՝ միասեռ կապերի և ամուսնական դավաճանության համար: Այդ մասին ապրիլի 8-ին հայտնել է Deutsche Welle-ն:
Ռադիոկայանի տվյալներով՝ բոյկոտն արտահայտվում է լյուքս կարգի ինը հյուրանոցների ծառայություններից օգտվելուց հրաժարմամբ, որոնք պատկանում են Brunei Investment Agency ընկերությանը, որոնց հիմնադիրը Բրունեյի սուլթան Հասանալ Բոլքիահն է: Այդ հյուրանոցները գտնվում են այդ թվում՝ Լոնդոնում, Փարիզում, Հռոմում, Միլանում, Բեւեռլի Հիլզում և Լոս Անջելեսում:
Բացի դրանից, Մեծ Բրիտանիայի STA Travel տուրիստական ընկերությունը, որը ճանապարհորդություններ է կազմակերպում երիտասարդության և ուսանողների համար, որոշել է դադարեցնել ավիատոմսերի վաճառքը Բրունեյի Royal Brunei ազգային ավիաընկերության չվերթների համար: Բացի դրանից, Լոնդոնի մետրոյում և ավտոբուսներում հրաժարվել են Բրունեյ ուղևորությունների գովազդից:
Ավելի վաղ դաժան օրենքի դեմ բողոքի կոչ են արել բրիտանացի երգիչ Էլթոն Ջոնը, և դերասան ու ռեժիսոր Ջորջ Քլունին:
Ապրիլի սկզբին Բրունեյում ուժի մեջ են մտել նոր օրենքներ, որոնք խստացրել են քրեական օրենսգիրքը՝ հենվելով շարիաթի օրենքների վրա: Այժմ միասեռ սեքսի համար չափահաս տղամարդկանց և կանանց սպառնում է մահապատիժ քարկոծման միջոցով: Ամուսնական դավաճանության կամ բռնաբարության համար նույնպես սպառնում է մահապատիժ, իսկ գողության համար՝ ձեռքերի և ոտքերի անդամահատում: Պատժի խստացումը կվերաբերի ոչ միայն երկրի բնակիչներին, այլև օտարերկրացիներին, հաղորդել է «Ինտերֆաքսը»:
