Սոցցանցերում անհետացել են Բրունեյի հյուրանոցների ակաունտները, քանի որ վերջերս երկրում ոչ ավանդական սեռական կողմնորոշում ունեցողների նկատմամբ և ամուսնական դավաճանության համար մահապատիժ կիրառելու օրենք են ընդունել, հաղորդում է Air Force-ը:
Երկրի բարձրակարգ հյուրանոցների դեմ բոյկոտի արշավ են սկսել աշխարհահռչակ դերասանները, որոնց թվում է նաև Ջորջ Քլունին: Նրանք կոչ են արել գումարներ չվճարել այն երկրին, որը որոշել է քարկոծել իր քաղաքացիներին նույնասեռական սեքսի և ամուսնական դավաճանության համար:
Բոյկոտի են ենթարկվել Բրունեյին պատկանող ինը հյուրանոցներ: Կտրուկ քննադատությունից հետո, սոցցանցերից անհետացել են ութ թանկարժեք հյուրանոցների ակաունտները: Նշվում է, որ դրանք գտնվում են աշխարհի տարբեր երկրներում. երկուական հյուրանոցներ գտնվում են Մեծ Բրիտանիայում, Միացյալ Նահանգներում, Ֆրանսիայում և Իտալիայում:
Բրունեյի իտալական հյուրանոցներից մեկի հաշիվը դեռևս գործում է Twitter- ում, սակայն դրա թվիթներն այլևս հնարավոր չէ դիտել:
Բոլոր հյուրանոցների, բացի երեքից, Instagram-ի ակաունտները հեռացվել են կամ անջատվել: Ֆրանսիայում գտնվող երկու և Հռոմում գտնվող մեկ հյուրանոցների ակաունտները անցել են ոչ պաշտոնական ռեժիմի, որպեսզի օգտվողները չկարողանան մեկնաբանություններ թողնել:
Բացի այդ, ցուցակի բոլոր հյուրանոցների էջերը ջնջվել են նաև Facebook-ում:
