«Էլ Ալ» ավիաընկերության բորտուղեկցորդուհին ծանր վիճակով հիվանդանոց է տեղափոխվել, երբ 002 չվերթի ժամանակ՝ Նյու Յորքի JFK օդանավակայանից Թել Ավիվ թռչող ինքնաթիռում, կարմրուկով է վարակվել։ Այս մասին հայտնում են իսրայելական ԶԼՄ-ները։
Բորտուղեկցորդուհին կարմրուկով վարակվել է վարակակիր ուղևորից։ Չնայած պատվաստմանը՝ կնոջ օրգանիզմը շատ ուժեղ է արձագանքել հիվանդությանը։
Նշվում է, որ 43-ամյա կնոջն արհեստական կոմայի մեջ են պահում, ինչպես նաև նրան արհեստական շնչառական սարք է միացված։
Իսրայելի առողջապահության նախարարությունը այդ չվերթի բոլոր ուղևորներին կոչ է արել հիվանդության ախտանիշերը տեսնելուն պես ընտանեկան բժշկի դիմել և առավելագույնը նվազեցնել հանրային տրանսպորտով երթևեկությունը, ինչպես նաև հասարակական վայրերում գտնվելը։
