«ԱԺ տնտեսագետ գործիչներից մեկն էլ հայտարարեց, որ լինելու է երկրորդ փուլ։ Ես կարծում եմ՝ քաղաքական առումով սա խիստ անընդունելի մոտեցում է, որ դեռևս երկրորդ փուլն է լինելու, որովհետև այդ դեպքում ներդրողները կանգ կառնեն և կսպասեն, թե երբ է լինելու այդ երկրորդ փուլը։ Ութ ամիս չէր եկել Հարկային օրենսգիրքը, ութ ամիս հետո նոր եկավ, այսինքն՝ ութ ամսվա ընթացքում չենք կարողանում համապարփակ բիզնեսի համար սահմանադրական նորմեր բերել, որպեսզի կարողանանք խթանենք ներդրումների հոսքը Հայաստան»,-անդրադառնալով Հարկային օրենսգրքի փոփոխությունների փաթեթին՝ «Առաջին լրատվական»-ի հետ զրույցում ասաց ԱԺ ԲՀԿ խմբակցության պատգամավոր Միքայել Մելքումյանը։ Նրա խոսքով՝ այս Հարկային օրենսգրքով լուծված չէ ներդրումների պաշտպանության խնդիրը, թե ինչ մեխանիզմներով պետք է ներդրողները իրենց անվտանգությունը զգան։ Պատգամավորի խոսքով՝ տարեկան 1,5-2 միլիարդ դոլարի ներդրում լինի, որպեսզի Հայաստանի տնտեսությունը կարողանա մեջքը ուղղել։
ԲՀԿ խմբակցությունը դեռ չունի որոշում՝ ինչպես կքվեարկի Հարկային օրենսգրքի այս փաթեթին։ Մելքումյանը չի կարծում, որ այս հարցում կլինի կոնսենսուս խորհրդարանական քաղաքական ուժերի միջև։
