Ամռան շոգ եղանակին տարատեսակ սեզոնային վիրուսները համեմատաբար քիչ են լինում, և տաք եղանակին մրսել-հիվանդանալու վտանգը ևս մեծ չէ։ Ավելին՝ ամառային արևը կոփում ու դիմացկուն է դարձնում ամենանուրբ մարդկանց, նույնիսկ երեխաներին։ Այնուհանդերձ, շոգ եղանակը կարող է բացասական հետևանքներ ունենալ մարդու առողջության վրա։
Շոգին դիմակայելու համար մարդիկ ավելի շատ են հեղուկներ օգտագործում, քան սովորաբար։ Դա, իհարկե, անխուսափելի է, քանի որ ամռանը մեր օրգանիզմին երկու անգամ ավելի շատ հեղուկ է հարկավոր, քան ձմռանը: Սակայն հեղուկի մեծ քանակը ծանրաբեռնվածություն է առաջացնում երիկամների համար, օրգանիզմից դուրս են գալիս էլեկտրոլիտներ ու աղեր, իսկ արյան ճնշման հետ խնդիրներ ունեցողների մոտ հնարավոր են նաև ճնշման տատանումներ՝ հեղուկի չարաշահման պատճառով։ Պետք է խուսափել գազավորված, քաղցր և կոֆեին ու ալկոհոլ պարունակող խմիչքներից։ Այս բոլորը իրենց մեջ պարունակում են միզամուղ նյութեր, իսկ հեղուկներ, ինչպես նշվեց, պետք են մեր օրգանիզմին։ Այնուհանդերձ ալկոհոլի անդիմադրելի ցանկություն ունենալու դեպքում կարելի է խմել կարմիր գինի` օրական 200-250 մլ՝ ոչ ավել:
Ինչ վերաբերում է ուտելիքներին, ապա, մասնագետները խորհուրդ են տալիս հետևել հետևյալ սկզբունքին։ Առօրյա ճաշացանկը պետք է կազմված լինի 14-15% պրոտեիններից (ձուկ, թռչնամիս, կաթնամթերք և այլն), 10-11% ճարպերից (ցանկալի են բուսական յուղերը, ոչ թե կենդանականը, քանի որ բուսականներն ավելի հեշտ են մարսվում և ավելի օգտակար են մեր օրգանիզմին) և մեծ քանակությամբ հանքային նյութերով, վիտամիններով և այլ օգտակար բաղադրիչներով հարուստ կարբոհիդրատներից (բանջարեղեն, մակարոնեղեն, մի քիչ հացաբուլկեղեն):
