Երբ պաշտպանության նախարար Դավիթ Տոնոյանը վերադառնա ԱՄՆ-ից, նա ընդհանուր հաշվետվություն կտա իր հանդիպումների վերաբերյալ: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Հովհաննես Իգիթյանը՝ անդրադառնալով ԱՄՆ-ում հայ համայնքի հետ հանդիպման ժամանակ Դավիթ Տոնոյանի այն հայտարարությանը, թե «տարածքներ՝ խաղաղության դիմաց» ձևաչափը վերաձևակերպել է որպես «նոր պատերազմ՝ նոր տարածքների դիմաց» ձևաչափի:
«Ես ենթադրում եմ, որ այդ հայտարարությունը հարցերի ինչ-որ կոնտեքստի մեջ է եղել: Ես ենթադրում եմ, որ այնտեղ հայ համայնքը մտահոգություն է հայտնել Ադրբեջանի ագրեսիվ հայտարարությունների հետ կապված: Հաշվի առնելով, որ ապրիլյան քառօրյա պատերազմի երեք տարին է լրանում, ես ենթադրում եմ, որ պաշտպանության նախարարն ուզում էր ասել, որ մենք չենք հանդուրժելու Ադրբեջանի ագրեսիվ գործողությունները և եթե անգամ Ադրբեջանը փորձի մտածել, թե կարողանում է իր զենքի գերակայությամբ լուծել Արցախի հարը, ապա մեր պաշտպանական համակարգը լրիվ պատրաստ է դիմակայելու այդ հարձակումներին: Եվ այդ դիմակայելը կլինի ոչ թե միայն խրամատներում, այլ նաև հարձակողական ձևով ջնջել Ադրբեջանի մտքից այն մոտեցումը, որ կարելի է զենքով լուծել այդ հարցը»,-ընդգծեց Իգիթյանը:
Հարցին, թե արդյոք դա տեղավորվում է Վիեննայի հանդիպման ընդհանուր օրակարգի մեջ, նա արձագանքեց. «Չեմ ուզում ամեն ինչ այդտեղ տեղավորել, բայց մի բան ակնհայտ է, որ Արցախի հիմնահարցը պետք է լուծվի խաղաղ ձևով և այդ միտքը չի հասկանում Ադրբեջանը: Մենք պետք է դա հասկացնենք Ադրբեջանին, իսկ եթե չի հասկանում, նաև միջազգային հանրության միջոցով պետք է մեսիջներ ուղարկենք»:
