«Հրապարակ» թերթը գրում է. ««Իմ քայլում» որոշում կա` Հարկային օրենսգիրքը քննարկման ներկայացնել երկու փուլով. խորհրդարանի հաստատմանը ներկայացնել այն դրույթները, որոնք վիճարկելի չեն, որպեսզի ժողովուրդն զգա արդեն իսկ կատարվող դրական փոփոխություններն «իր մաշկի վրա», հետո անցնել «դժվար» խնդիրներին:
Առաջին փուլին խանգարում են Արսեն Թորոսյանի գազավորված ըմպելիքներին և ծխախոտի ակցիզային հարկերին վերաբերող «դրույթները»: Տնտեսական մետրերը՝ Վարազդատ Կարապետյանը, Բաբկեն Թունյանը, Հայկ Գևորգյանը, հավաքվել են «օֆ դը ռեկորդ», քննարկել այդ խնդիրը և որոշել են Արսեն Թորոսյանին հորդորել հետ կանգնել իր առաջարկներից։ «Դե, Արսենն էլ քինախնդիր, խռովկան, փորձում են բացատրական աշխատանք տանել հետը։ Էս պահին քննարկումներ են ընթանում, տեսնենք ինչ կստացվի»,- ասաց «Իմ քայլի» մեր աղբյուրը:
Ե՞րբ կընդունվի Հարկային օրենսգրքի առաջին մասը՝ հարցրինք ԱԺ պատգամավոր Բաբկեն Թունյանին։ «Գազային ըմպելիքների մասով հենց նոր ամբիոնից հնչեց, որ խնդիրը լուծվել է` դրանք չեն հարկվի, իսկ ծխախոտի մասով՝ կբերեն առաջարկն ԱԺ, նոր կերևա, թե մենք ինչ դիրքորոշում կցուցաբերենք։ Երբ կընդունվի Հարկային օրենսգրքի առաջին փաթեթը՝ կախված է, թե կառավարությունը երբ այն կուղարկի ԱԺ։ Կարծում եմ` մինչև շաբաթվա վերջ մեր մոտ կլինի»:
Առավել մանրամասն՝ թերթի այսօրվա համարում:
