Հայաստանի կառավարության և «Լիդիան Արմենիա» ընկերության հարաբերությունը կարծես թե գնում է լարվածության աճի ճանապարհով: «Ընկերություններ կան, որ գալիս են, ասում՝ կդիմենք միջազգային դատարան, ու զգում են, որ ՀՀ ներկայացուցիչները չեն ուշաթափվում, իրենք են վատանում՝ ո՞նց, մեզանից չե՞ք վախում… Ո՛չ, չենք վախենում, էդ դուք մեզանից պետք է վախենաք, եթե վախենալու բան կա, և ոչ մենք ձեզնից»,- խորհրդարանում հայտարարել է վարչապետը, երբ պատգամավորները նրան հարց են ուղղել «Լիդիանի» հետ հնարավոր դատական վեճի մասին՝ միջազգային արբիտրաժում:
Այս և մի շարք այլ հարցերի շուրջ «Առաջին լրատվական»-ի հետ քննարկմանը մասնակցեցին քաղտեխնոլոգ Արմեն Բադալյանը, վերլուծաբան Հակոբ Բադալյանը և կառավարման փորձագետ Սերոբ Անտինյանը:
Ա. Բադալյանի գնահատմամբ՝ «Լիդիան Արմենիա» ընկերության հետ ՀՀ կառավարության վեճը մեծ փորձություն է, քանի որ «Լիդիանը» բավականին մեծ ներդրում է իրականացրել Հայաստանի հանքարդյունաբերության մեջ: Քաղտեխնոլոգի դիտարկմամբ՝ թեև կարևոր են թե՛ ներդրումային ծրագիրը, թե՛ բնապահպանության հետ կապված խնդիրները, այնուամենայնիվ, առաջնային խնդիր է այն, որ կառավարությունը ներկայացնի ՀՀ-ում հանքարդյունաբերության զարգացման հայեցակարգը, որպեսզի հասկանալի լինի՝ ՀՀ-ում հանքարդյունաբերությունը պետք է զարգացնել, թե բոլոր հանքերը փակվելու են:
Հակոբ Բադալյանի դիտարկմամբ՝ հարցն, անշուշտ, միայն բնապահպանական չէ. «Ավելին՝ ԱՄՆ-ն այդ հարցը շեշտադրել է քաղաքական մակարդակում՝ որպես ներդրողի նկատմամբ վերաբերմունքի հարց: Առանցքայինը հետևյալն է. Հայաստանի ջրային կարևոր ավազանի և ռազմավարական ջրային պաշարի նկատմամբ կա՞ վտանգ, թե՞ ոչ: Եթե վտանգ չկա, ներդրումները պետք է շարունակել, եթե վտանգ կա, ապա, որքան էլ անցանկալի ու տհաճ է իրավիճակը, մենք իրավունք չունենք վտանգել մեր ռազմավարական ռեսուրսները»:
«Պետք է հասկանալ՝ մեզ հանքարդյունաբերություն պետք է թե ոչ, նամանավանդ հանքարդյունաբերության այնպիսի տեսակը, որ մինչ այժմ կիրառվել է Հայաստանում, այն կարելի է նմանեցնել սարը քանդել և տեղափոխելուն: Սրանք ռազմավարական նշանակության հարցեր են և հայեցակարգային մոտեցումներ են պահանջում»,- նշեց: Ս. Անտինյանը՝ հավելելով, որ պետք է նժարին դնել՝ ինչ ենք ստանում տնտեսապես և ինչ կարող ենք կորցնել բնապահպանական և այլ առումներով:
Քննարկման մասնակիցների դիտարկմամբ՝ վարչապետի այսօրվա արձագանքը տեղին էր: «Ոչ մի տնտեսվարող սուբյեկտ իրավունք չունի շանտաժի լեզվով խոսել պետության հետ, ոչ ոք իրավունք չունի»,- ընդգծեց Ա. Բադալյանը:
Մանրամասն՝ տեսանյութում:
