Expert Club-ի փոխանցմամբ՝ Պետդումայի պատգամավոր, Հասարակական միավորումների ու կրոնական կազմակերպությունների հարցերով կոմիտեի փոխնախագահ, իշխող «Եդինայա Ռոսիա» կուսակցության անդամ Սերգեյ Մարկովը ներողություն է խնդրել առավել վաղ վրացական PIC հեռուստաալիքին տված հարցազրույցի ժամանակ իր հնչեցրած հայտարարությունների կապակցությամբ։
Մարկովն «իրենց ժողովրդի փչացածներ ու դավաճաններ» էր որակել այն չերքեզներին, ովքեր մասնակցել էին վրացական կոնֆերանսներին ու Վրաստանի խորհրդարանի այն նիստին, որում ճանաչվել էր Ցարական Ռուսաստանի կողմից չերքեզների ցեղասպանությունը։
Adyghe Khase հասարակական շարժման (Ադըղեայի Հանրապետության չերքեզական խորհրդարան) ղեկավար Արամբի Խապայը Մարկովի վերոնշյալ հայտարարությունը համեմատել էր 1861 թվականին Մայկոպ այցելած ռուսական կայսր Ալեքսանդր 2-րդի հետևյալ հայտարարության հետ. «Մեզ անհրաժեշտ է Չերքեզիան, սակայն բուն չերքեզների կարիքը մենք չենք զգում»։
Խապայը կարծում է, որ չերքեզ ժողովրդի խնդիրների նկատմամբ Մարկովի կարծիքն ու դիրքորոշումը հակասում են Ռուսաստանի Պետդումայում նրա զբաղեցրած պաշտոնին։
Հիշեցնենք, որ Վրաստանի խորհրդարանը երեկ գիշեր արտահերթ նիստի ժամանակ միաձայն հաստատել է Աբխազիայի սահմանի մոտ ընկած Անակլիա վայրում Ռուսական կայսրության կողմից իրագործված չերքեզների ցեղասպանության հուշակոթող կառուցելու որոշումը։
