Google Chrome բրաուզերը շարունակում է նոր գագաթներ նվաճել աշխարհում բրաուզերների շուկայում: Նրա մասնաբաժինն առաջին անգամ պատմության ընթացքում գերազանցել է 20%-ը: Այս մասին են վկայում StatCounter ընկերության կողմից անցկացված հետազոտությունները:
Պարզվել է, որ 2011 թ. հունիսին Google Chrome բրաուզերից օգտվել է աշխարհում ինտերնետ օգտագործողների 20.7%-ը, ինչը գրեթե 7 անգամ ավելի է, քան 2 տարի առաջ, երբ այդ թիվը կազմում էր 2.8%: Google Chrome բրաուզերը շուկա է մտել 2008թ. դեկտեմբերին:
Ըստ նույն հետազոտության՝ առաջատարը շարունակում է մնալ Microsoft-ի Internet Explorer-ը, որի մասնաբաժինը կազմում է 44%՝ 2009 թ. հունիսի 59%-ի դիմաց, Mozila Firefox-ը գրավել է օգտատերերի 28%-ի ուշադրությունը՝ 2009 թ. հունիսի 30%-ի դիմաց:
Նշվում է, որ 2000-ականների սկզբին այս շուկայում գերակշռող դեր ուներ Microsoft-ը (մոտ 95%), սակայն տարիների ընթացքում այն կորցրեց շուկայի ավելի քան կեսը:
