Վրաստանի նախկին նախագահ Միխայիլ Սահակաշվիլիի կինը՝ Սանդրա Ռուլովսը, մտադիր է մայիսին որպես թեկնածու մասնակցել Զուգդիդի՝ Վրաստանի արևմուտքում գտնվող Սամեգրելո-Վերին Սվանեթի երկրամասի վարչական կենտրոնի քաղաքապետի արտահերթ ընտրություններին՝ տեղեկացնում է Interfax-ը։
Զուգդիդի քաղաքապետի պաշտոնի համար նրա թեկնածությունը մարտի 22-ին առաջադրել է «Ուժը միասնության մեջ է» ընդդիմադիր միավորումը:
«Մենք վստահ ենք Զուգդիդի քաղաքապետի առաջիկա ընտրություններում Սանդրա Ռուլովսի անվերապահ հաղթանակին, եթե ընտրությունները չկեղծվեն իշխանությունների կողմից»,- ճեպազրույցում հայտարարել է «Ուժը միասնության մեջ է» միավորման առաջնորդ Գրիգոլ Վաշաձեն:
2016թ․ կայացած խորհրդարանական ընտրություններում Ռուլովսը Զուգդիդի շրջանում իր թեկնածությունն առաջադրել էր «Միասնական ազգային շարժում» նախկին իշխող կուսակցությունից, սակայն ընտրությունների երկրորդ փուլում հանեց իր թեկնածությունը՝ իր որոշումը բացատրելով իշխանությունների կողմից քվեարկության առաջին փուլի արդյունքների կեղծմամբ: Զուգդիդի քաղաքապետի պաշտոնը թափուր է մնում 2018թ․ աշնանից, երբ նախկին քաղաքագլուխը՝ Լաշա Գոգիան, իրավապահ մարմինների կողմից ձերբակալվեց կաշառք ստանալու մեղադրանքով։
