«Նախ՝ պետք է հասկանալ, թե ինչ է նշանակում ձևաչափ: Ալիևը՝ ասելով, թե ձևաչափը չպետք է փոխվի, երևի նկատի ունի, որ ինքը բավականին երկար ժամանակ բանակցում էր Հայաստանի առաջին դեմքերի հետ»,- մեկնաբանելով Ադրբեջանի նախագահ Ալիևի հայտարարությունը՝ «Առաջին լրատվական»-ի հետ զրույցում ասաց «Իմ քայլը» խմբակցության պատգամավոր Հովհաննես Իգիթյանը:
Նա ընդգծեց, որ մեզ համար, սակայն, ձևաչափը այն է, որն իրավաբանորեն ամրագրված է Մինսկի խմբի կանոնադրական բոլոր փաստաթղթերում. «Այն է՝ Լեռնային Ղարաբաղը ակտիվ մասնակից է բանակցային պրոցեսին»:
Իգիթյանի խոսքով՝ Մինսկի խմբի համանախագահների վերջին հայտարարությունը ուղղված էր այնպիսի պայմանների ստեղծմանը, որ հնարավոր լինի բանակցություններ վարել. «Մենք այսօր չենք բանակցում, և երկու երկրների ղեկավարների կողմից սպասվելիք հանդիպումը ուղիղ կոնտակտ է:
Եվ այսօր մենք Մինսկի խմբի համանախագահների հետ փորձում ենք վերականգնել այն մթնոլորտը, որը խաթարվել է 2016թ.-ին Ադրբեջանի ագրեսիայի պատճառով»:
Նա նշեց, որ հանդիպումների ժամանակ պետք է լինի, այսպես ասած, տրամաբանությունների մրցակցություն, թե՝ ինչի համար ենք բանակցում. «Տրամաբանությունը հուշում է, որ եթե մենք լուծում ենք ոչ թե Հայաստանի կամ Ադրբեջանի ժողովրդի խնդիրը, այլ ԼՂ հարցը, ապա Ալիևը ուզի, թե չուզի՝ Լեռնային Ղարաբաղը պետք է ներկա գտնվի բանակցային գործընթացին»:
Առավել մանրամասն՝ տեսանյութում: