Եթե խնդրին նայենք Նիկոլ Փաշինյանի տեսակետից, մեկնաբանությունները, որ արվում են, հիմնվում են այն փաստի վրա, որ իրենք համարում են, որ նոր լիարժեք իշխանություն ունեն։ Այս մասին «Առաջին լրատվական»-ի հետ զրույցում նշեց ԲՀԿ խմբակցության պատգամավոր Սերգեյ Բագրատյանը՝ անդրադառնալով ՀՀ վարչապետ Նիկոլ Փաշինյանի հայտարարությանը, թե եթե այսօր լինեին ընտրություններ, «Իմ քայլը» դաշինքը կարող էր էլ ավելի բարձր տոկոսներ ստանալ։
«Այսինքն մենք համարում ենք, որ մայիսի 8-ից նրանք ունեն իշխանություն, իսկ իրենք ասում են, որ իշխանություն ունեն դեկտեմբերի 9-ից հետո, երբ նաև ԱԺ-ում մեծամասնություն ունեցան։ Եթե դեկտեմբերից ենք հաշվում, այս երեք ամսում հնարավոր չէր, որ վարկանիշի անկում այսպես թե այնպես չունենային։
Գործող իշխանությունը չի կարող արագ սպասարկել հանրային սպասելիքները։ Մենք հասարակության հետ շփվում ենք և տեսնում ենք, որ շատերի մոտ սպասելիքներն ավելին էին, քան այս պահին կա։ Միգուցե հետագայում շատ հարցերի պատասխաններ ստանան, բայց այս պահին պնդել, որ պետք է նույն վարկանիշը լինի, ես այդ կարծիքին չեմ։ Հանրային սպասելիքները շատ են և նոր իշխանությունը չի հասցնում սպասարկել այդ շահերը»,-ընդգծեց Բագրատյանը։
