Ես չէի ասի, որ Հարկային օրենսգրքի հետ կապված կառավարության և ԱԺ-ի միջև գաղափարական տարաձայնություններ կան։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Հովիկ Աղազարյանը։
Նրա խոսքով, մասնավորապես, համահարթ եկամտային հարկի ներդրման նպատակն է խթանել տնտեսությունը. «Հարկային քաղաքականությունը պետք է որպես գործիքակազմ օգտագործել այդ խնդրի լուծման համար։ Ճիշտ է, ակցիզային հարկերի կիրառման պատճառով, հնարավոր է տուժեն սոցիալապես անապահով մեր քաղաքացիները, սակայն նաև զուգահեռ այլ քաղաքականություն է իրականացվում նույն հարկային օրենսգրքով։ Օրինակ, մինչև 24 մլն շրջանառություն ունեցող տնտեսավարողներն ազատվելու են հարկերից։ Մի կողմից դա կմեղմացնի վիճակը, մյուս կողմից այն լրացուցիչ գումարները, որ բյուջե կմտնեն այդ ճանապարհով, դրանց մի մասը կուղղվի սոցիալապես անապահով խավերին օժանդակելուն։ բայց այս քաղաքականության արդյունքում կխթանվի ու կզարգացնի տնտեսությունը»,-ասաց նա։
