«Նախ՝ այն փաստը, որ Անվտանգության խորհուրդների համատեղ նիստը Ստեփանակերտում է անցկացվում, աննախադեպ էր և իր մեջ ուղերձներ էր պարունակում։ Դրանով ուղերձ էր հղվում մեր հասարակության այն հատվածին, որոնք ասում էին՝ եթե Նիկոլ Փաշինյանը հրաժարվում է բանակցել Ղարաբաղի անունից, դա նշանակում է, որ Ղարաբաղին միայնակ է թողնում Ադրբեջանի դեմ հանդիման։ Այսպիսով, ուղերձ հղվեց, որ դա այդպես չէ։ Ուղերձ հղվեց Ադրբեջանին ու նրա հասարակությանը, որ հանկարծ հույս չունենաք, թե դա ինչ-որ բան է նշանակում, որովհետև Հայաստանը եղել է, կա ու կլինի Արցախի անվտանգության հիմնական երաշխավորը»,- «Առաջին լրատվական»-ի հետ զրույցում ասաց քաղաքագետ Արմեն Բաղդասարյանը։
«Բովանդակային առումով ուղերձը, որ հղվեց միջազգային հանրությանը, այն է, որ այդ երեք հիմնարար սկզբունքները և վեց տարրերը պետք է հստակեցվեն, պետք է ձևակերպումներն այնպիսին լինեն, որ ամեն մեկը չկարողանա իր ուզած ձևով մեկնաբանել, այսինքն՝ բանակցությունների հիմքերը պետք է հստակ լինեն։ Սա շատ կարևոր ուղերձ էր, և ամենայն հավանականությամբ, նպաստելու է՝ առաջիկայում տեղի ունեցող Փաշինյան-Ալիև հանդիպումն արդյունավետ լինի։ Սա հանդիպումներից, շփումներից դեպի առարկայական բանակցություններ անցնելու կարևոր քայլ էր»,- հավելեց քաղաքագետը։
Արմեն Բաղդասարյանը նաև հավելեց․ «Հակամարտության կարևորագույն, առանցքային խնդիրը Արցախի վերջնական կարգավիճակն է։ Այդ կարգավիճակը որոշելու է Արցախի ժողովուրդը հանրաքվեի կամ, ինչպես իրենք են ասում՝ ազատ կամարտահայտման միջոցով։ Այսինքն՝ կարևորագույն հարցը, այսպես թե այնպես, Արցախն ու իր ժողովուրդն է որոշելու։ Այնպես որ, որքան շուտ Արցախը մասնակցի բանակցություններին, այնքան բանակցային գործընթացն ավելի արագ և արդյունավետ կլինի»։
Մանրամասները՝ տեսանյութում։
