Հայաստանի ֆուտբոլի ֆեդերացիան երեկ վաճառքի հանեց 2020 թվականի Եվրոպայի առաջնության ընտրական փուլի շրջանակներում մարտի 26-ին «Հանրապետական» մարզադաշտում կայանալիք Հայաստան-Ֆինլանդիա հանդիպման տոմսերը: ՀՖՖ պաշտոնական կայքում նշվում է, որ տոմսային քաղաքականության նոր կոնցեպտի՝ մարզադաշտի տոմսերի ընդհանուր քանակի 50%-ից ավելին (հյուսիսային և հարավային տրիբունաներ) կարելի է ձեռք բերել 1000 դրամով: Ըստ տրիբունաների՝ սահմանվել են տոմսերի հետևյալ գները՝ հյուսիսային և հարավային տրիբունաներ՝ 1000 դրամ, արևելյան տրիբունա՝ 3000-5000 դրամ, արևմտյան տրիբունա՝ 7000-9000 դրամ: Հիշեցնենք, որ ՀՖՖ նախագահ ընտրվելուց հետո Արթուր Վանեցյանը զգալիորեն իջեցրել էր ազգային հավաքականի մասնակցությամբ հանդիպման տոմսերը, ինչը խթան հանդիսացավ, որպեսզի «Հանրապետական» մարզադաշտը ավելի լեցուն դառնա:
Նախորդ տարվա հոկտեմբերին Ջիբրալթարից կրած խայտառակ պարտության ժամանակ «Հանրապետական» մարզադաշտ էր եկել մոտ 9-10 հազար ֆուտբոլասեր, ինչը կարելի է բավական բարձր ցուցանիշ համարել: Վանեցյանի կողմից տոմսերի գների իջեցումը կարևորագույն քայլերից մեկն էր հայկական ֆուտբոլը զարգացնելու և մասսայական դարձնելու գործում: Այն մեծ ոգևորություն էր առաջացրել նաև երկրպագուների շարքերում: Հիշեցնենք, որ ՀՖՖ նախկին նախագահ Ռուբեն Հայրապետյանի օրոք սովորաբար հյուսիսային և հարավային տրիբունաների տոմսերն արժեին 4000 դրամ: Երկրպագուները բազմիցս էին իրենց բողոքի ձայնն արտահայտել տոմսերի թանկ լինելու վերաբերյալ, բայց…
Ինչևէ, երեկ սոցիալական կայքերում շարունակ հիշատակվում էր ՀՖՖ տոմսային քաղաքականության նոր կոնցեպտի մասին: Այո, մարզադաշտի կեսից ավելիի տոմսերը արժեն 1000 դրամ, բայց այս կոնցեպտը կարծես թե նոր չէ: Վանեցյանի գլխավորած ՀՖՖ-ն հյուսիսային և հարավային տրիբունաների տոմսերը 1000 դրամով էր վաճառել նաև նախորդ տարի հոկտեմբերին տեղի ունեցած Հայաստան-Ջիբրալթար և Հայաստան-Մակեդոնիա մրցավեճերի ժամանակ: Ավելին, նշված հանդիպումների համեմատ Հայաստանի ֆուտբոլի ֆեդերացիան որոշակիորեն փոխել է գնային քաղաքականությունը և թանկացրել տոմսերը: Մասնավորապես, Հայաստան-Ջիբրալթար և Հայաստան-Մակեդոնիա հանդիպումների արևելյան տրիբունայի տոմսերն արժեին 3000-4000, իսկ արևմտյան տրիբունաների տոմսերը՝ 5-7 հազար դրամ:
Հայաստան-Ֆինլանդիա խաղի արևելյան տրիբունայի տոմսերն արժեն արդեն 3000-5000, իսկ արևմտյան տրիբունայի տոմսերը՝ 7-9 հազար դրամ: Փաստորեն, վերջին հանդիպումների համեմատ ՀՖՖ-ն արևելյան տրիբունայի տոմսերը թանկացրել է 1000, իսկ արևմտյան տրիբունայի տոմսերը՝ միանգամից 2000 դրամով: Նշենք, որ Ռուբեն Հայրապետյանի օրոք արևմտյան տրիբունայի տոմսերն արժեին 8000-10000, իսկ արևելյան տրիբունայի տոմսերը՝ 5000-7000 դրամ: Ռուբեն Հայրապետյանի օրոք Հայաստանի ազգային թիմը վերջին հանդիպումն անցկացրել էր նախորդ տարվա սեպտեմբերին՝ Ազգերի լիգայի խաղարկության շրջանակներում հյուրընկալելով Լխտենշտեյնի հավաքականին: Այս հանդիպման հյուսիսային և հարավային տրիբունաների տոմսերը Հայրապետյանի գլխավորած կառույցը վաճառել էր 2000 դրամով:
Եթե համեմատենք Հայրապետյանի օրոք վերջին հանդիպման գնային քաղաքականությունը Հայաստան-Ֆինլանդիա հանդիպման հետ, ապա կստացվի ՀՖՖ նոր ղեկավարությունը 1000 դրամանոց քայլ է կատարել և PR-ի միջոցով փորձում է այն, այսպես կոչված, «ռասկրուտկա» անել: Ավելի ստույգ, Հայաստան-Լիխտենշտեյն հանդիպման տոմսերի 50 տոմսերից ավելին արժեին 2000, իսկ այժմ՝ 1000 դրամ:
Ինչ խոսք, ցավալի է, որ նախորդ հանդիպումների համեմատ ՀՖՖ նոր ղեկավարությունը թանկացրել է գները: Արդեն իսկ նկատվում է տենդենց ՀՖՖ նախկին համակարգի տոմսային քաղաքականությանը նմանվելու: Այստեղ հարց է ծագում՝ ինչո՞ւ է ՀՖՖ-ն թանկացրել ազգային հավաքականի տոմսերը: Մի՞թե հնարավոր չէր պահպանել այն գնացուցակը, որը սահմանված էր Հայաստան-Ջիբրալթար և Հայաստան-Մակեդոնիա հանդիպումների ժամանակ: Բնական է, որ այս հարցի վերաբերյալ ՀՖՖ-ն կունենա իր մեկնաբանությունը, օրինակ՝ նշելով, որ վերջին հանդիպումները Ազգերի լիգայի շրջանակներում էին, իսկ Հայաստան-Ֆինլանդիան ընտրական փուլի մրցավեճ է, և որ Եվրոպայի առաջնության ընտրական փուլը կարգով ավելի բարձր է Ազգերի լիգայից: Այսօր Հայաստանի ազգային հավաքականը, մեղմ ասած, ծանր վիճակում է գտնվում, և Եվրո-2020-ի մեկնարկային հանդիպումներում հավանականությունը փոքր է, որ դրական արդյունքի կհասնենք: Ավելին, կա հավանականություն, որ մարտի 23-ին Բոսնիա և Հերցեգովինայի արտագնա հանդիպումից հետո ֆուտբոլիստների որոշ մասը նույնիսկ տոմսերի ձրի լինելու դեպքում չի ցանկանա մարտի 26-ին մարզադաշտ գնալ:
Շատերը կհամաձայնեն, որ ներկայիս վիճակում տոմսերի գների բարձրացումը պատեհ չէր: Մնում է հուսալ, որ առաջիկա հանդիպումներում մեր հավաքականը արժանի խաղ կցուցադրի, և «Հանրապետականի» տոմսարկղերի մոտ հերթեր կգոյանան:
