Այս շաբաթ Հայաստան են ժամանելու ԵԽԽՎ-ում ՀՀ ստանձնած պարտավորությունների գնահատման հարցով համազեկուցողները:
«Նրանց այցի մեջ զարմանալի ոչինչ չկա: Ինչպես գիտեք, Եվրոպայի խորհրդի անդամ մի շարք երկրներ, այդ թվում նաև Հայաստանը գտնվում է մոնիտորինգի ընթացակարգի տակ, ինչը նշանակում է, որ երկու տարին մեկ անգամ տվյալ երկրի վերաբերյալ ներկայացվում է զեկույց»,- «Առաջին լրատվական»-ի հետ զրույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը և հավելեց, որ ինքը չի կարող կանխատեսել, թե համազեկուցողները ինչ տպավորություններով կհեռանան Հայաստանից:
Նրա խոսքով՝ համազեկուցողները հանդիպելու են ոչ միայն իշխող քաղաքական ուժի ներկայացուցիչներին, այլև ՀՅԴ-ին, ՀՀԿ-ին, քաղաքացիական սեկտորի ներկայացուցիչներին. «Ես կարծում եմ՝ իրենք կանդրադառնան նաև ատելության և սոցիալական մեդիայում ագրեսիվ քարոզին»:
Այնուամենայնիվ, Նաիրա Զոհրաբյանը կարծում է, որ մոնիտորինգի ընդհանուր գնահատականը կլինի դրական. «Հունվարյան նստաշրջանում բյուրոյի հաշվետվության զեկույցի ժամանակ անդրադարձ եղավ Հայաստանում տեղի ունեցած դեկտեմբերյան ընտրություններին, և եվրոպացի պատգամավորների ընդհանուր մեսիջը դրական էր, որ Հայաստանը շատ մեծ առաջընթաց քայլ կատարեց՝ ազատվելով կոռուպցիոն նախկին համակարգից, և հիմա գնդակը Հայաստանի դաշտում է՝ կկարողանա՞ Հայաստանը թավշյա հեղափոխությունից հետո իր այդ մեծ ձեռքբերումը տրանսֆորմացնել ժողովրդավարական բարեփոխումների բոլոր ուղղություններով»:
Առավել մանրամասն՝ տեսանյութում:
