Հայաստանի Հանրապետության ազգային հերոս, սպարապետ Վազգեն Սարգսյանն իր ծննդյան օրը վերջին տարիներին մշտապես այցելում էր Եռաբլուր:
Այս մասին մարտի 5-ին, Եռաբլուր զինվորական պանթեոնում լրագրողների հետ զրույցում ասաց Վազգեն Սարգսյանի եղբայր Արմեն Սարգսյանը:
«Վազգեն Սարգսյանն առհասարակ չէր սիրում իր ծննդյան օրը: Հիմնականում վերջին տարիներին առավոտյան, երբ արթնանում էր, պատերազմի բովով իր անցած հին ընկերների հետ գալիս էր Եռաբլուր: Երկար էին մնում Եռաբլուրում, պտտվում էին ու յուրաքանչյուր զինվորի, յուրաքանչյուր իր մարտական ընկերոջ կողքով անցնելով՝ ծաղիկներ էին դնում: Վերջում որևէ տեղ նստում էին, տղաների հետ մի-մի բաժակ խմում էին ու գալիս էր երկրապահ: Երկրապահում էլ տղաների հետ էլ մի փոքրիկ նշում էին: Երեկոյան գալիս էր տուն, որովհետև, ի վերջո ծնողները սպասում էին:
Պաշտոնապես իր ծնունդը նշել չէր սիրում»,- ասաց Սարգսյանը:
Մարտի 5-ին լրանում է Հայաստանի ազգային հերոս, սպարապետ Վազգեն Սարգսյանի ծննդյան 60-ամյակը:
