ԱԺ նախկին փոխխոսնակ Արփինե Հովհաննիսյանը հրապարակել է փոխվարչապետ Մհեր Գրիգորյանի և ֆինանսների նախարար Ատոմ Ջանջուղազյանի՝ վարչապետ Փաշինյանին ուղղված գրությունը, որոնցով ներկայացվում է պետծառայողների օպտիմալացման ընթացիկ վիճակը, ըստ որի՝ մոտ 10 հազար հավելյալ արդյունք չստեղծող հանրային ծառայողներ հնարավոր է դառնան գործազուրկ, և «դրանից շահում է հայոց պետականությունը»:
«Բարգավաճ Հայաստան» խմբակցության պատգամավոր Սերգեյ Բագրատյանը այս առնչությամբ «Առաջին լրատվական»-ի հետ զրույցում ասաց. «Ես բացարձակ չեմ կիսում Արփինե Հովհաննիսյանի մտահոգությունները, որովհետև վստահ եմ՝ կրճատումներ ասվածը այդպես մեխանիկորեն չի կատարվելու: Գիտեմ, որ պետք է իրացվեն համարժեք ծրագրեր»:
Սերգեյ Բագրատյանը հավելեց՝ այդ թիվը հորինած թիվ է. «Ես վստահ եմ, որ 10 հազար քաղաքացի չի կարող դուրս մնալ: Վստահ եմ, որ դա աստիճանաբար կարվի, և կգնա դեպի կառուցակարգերի փոփոխության»:
Նրա խոսքով՝ այսօր խնդիրը այլ կերպ է դրված. «Եթե մենք ասում ենք՝ տնտեսական հեղափոխություն, բնականաբար դա բերելու է որոշակի կառուցակարգերի փոփոխության: Ցավո՞տ է դա՝ իհարկե ցավոտ է, կարո՞ղ ենք հնարավորինս մեղմել՝ իհարկե կարող ենք: Եթե մենք փորձենք նույն ձևով կազմակերպել մեր տնտեսությունը, երբ արդյունավետ չէինք աշխատում, կունենանք նախկին վիճակը: Իսկ եթե մեզ բավարարում էր նախկին վիճակը, ուրեմն այս ամեն ինչը անիմաստ էր. հեղափոխությունը կոչված է խնդիրները լուծելու»:
Առավել մանրամասն՝ տեսանյութում:
