«90 միլիոն տոննա աղբ, որը զբաղեցնում է Մոսկվայի ողջ տարածքը 5 մետրանոց շերտով և 4 հարկանի տան բարձրությամբ»,- այսօր «Աղբի խնդիրը, ինչպես խուսափել աղբային աղետից» թեմայով Երևան-Մոսկվա մուլտիմեդիոն տեսակամրջի ժամանակ տեղեկացրեց ՌԴ Պետդումայի պատգամավոր, Պետդումայի սեփականության կոմիտեի անդամ Ալեքսեյ Պլախոդնիկովը` հավելելով, որ եթե շտապ միջոցներ չձեռնարկվեն, մի քանի տարի անց Ռուսաստանը չի խուսափի աղբային աղետից: Նա նաև ընդգծեց, որ Ռուսաստանի Դաշնության նախագահի հանձնարարականով մասնագետները պետք է աղբահանությունը դարձնեն բիզնեսի առարկա:
Մոսկվայի РИА Новости-ի տաղավարում ցուցադրվեց հոլովակ, որը պատմում էր թե ինչպես քաղաքացին աղբահանությունը կարող է շահութաբեր գործունեություն դարձնել: Նշենք նաև, որ աղբի ընդհանուր քանակից, որը հիվանդությունների, համաճարակների պոտենցիալ աղբյուր է, հաջողվում է վերամշակել միայն 50-70 տոկոսը։
Սակայն աղբի վերամշակման խնդիրը միայն ռուսական խնդիր չէ։ Ինչպես տեղեկացրեց Երևանի քաղաքապետարանի զարգացման և ներդրումային ծրագրի վարչության պետ էդուարդ Ներսիսյանը, հունիսի 21-ին Հայաստանի խորհրդարանի արտահերթ նիստի ժամանակ պատգամավորները քննարկման առարկա են դարձրել «աղբահանության և սանմաքրման մասին» օրենքում նախատեսված փոփոխությունները:
Անդրադառնալով հետագա անելիքներին՝ Ներսիսյանը նշեց, որ Երևանում հաջորդ տարի աղբահանության նոր ստանդարտ կլինի, քանի որ նախատեսվում է պայմանագրեր ստորագրել երեք միջազգային աղբահանող օպերատորների հետ նոր աղբանոցի շինարարության համար:
