«Ռուսաստանցի մեր որոշ գործընկերներ երեկ Բաքվում մասնակցել են վառ արտահայտված հակահայկական ակցիայի: Ավելին, արդարացի տարակուսանք է հարուցում, որ նրանցից ոմանք անգամ հայ-ռուսական միջխորհրդարանական հանձնաժողովի անդամ են». այս հայտարարությունն արել է Հայաստանի Ազգային ժողովի նախագահը Ռուսաստանի Դաշնության խորհրդի լիագումար նիստում։ Հայտնի է, որ Բաքուն Խոջալուի իրադարձությունները որակում է իբրև «ցեղասպանություն»՝ հայկական կողմի վրա բարդելով Ադրբեջանի ներքին հարցերով պայմանավորված խաղաղ բնակիչների գնդակահարությունը, որոնց հեռանալու համար հայկական կողմը թողել էր մարդասիրական միջանցք: Ավելին, Ադրբեջանն իր այդ գնահատականը դարձրել է քարոզչական հիմնական ուղղություններից մեկը, որին էլ երեկ Բաքվում մասնակցել են ռուսաստանցի փորձագետներ և Պետդումայի պատգամավորներ՝ փաստացի դառնալով Հայաստանի և Արցախի դեմ Ադրբեջանի քարոզչական գործիք:
Թեմայի շուրջ «Առաջին լրատվական»- ի հետ քննարկմանը մասնակցեցին տեղեկատվական անվտանգության փորձագետ Սամվել Մարտիրոսյանը, քաղաքագետներ Վլադ Հովհաննիսյանը և Արմեն Բաղդասարյանը:
«Պետք է ողջունել ԱԺ նախագահ Արարատ Միրզոյանի՝ Մոսկվայում արված հայտարարության փաստը՝ դա գնահատելով առաջին հերթին որպես ինքնիշխանության դրսևորման քայլ»- նշեց Վ. Հովհաննիսյանը:
Սամվել Մարտիրոսյանի դիտարկմամբ՝ վերջին երկու շաբաթներին Ռուսաստանից ակնհայտ մեսիջներ են գալիս: Առաջինը՝ ռեպորտաժն էր, որով անդրադարձ էր կատարվել նոյեբերին Հայաստանում կայացած հավաքին և հիմնական մեխն այն էր, որ իբրև թե Հայաստանում պատրաստվում են ԱՄՆ փողերով հեղափոխություն իրականացնել: «Ռաշա թդեյի» գլխավոր խմբագիր Մարգարիտա Սիմոնյանը, նրա ամուսինը՝ Տիգրան Քյոսայանը այդ թեմայի շուրջ երկու օր շարունակ խոսում էին, գրում… «Դրան զուգահեռ Հայաստանը հումանիտար առաքելություն է ուղարկում Սիրիա, ինչը Հայաստանի իմիջի համար բավականին լուրջ հարված էր Արևմուտքում: Դա շատ լուրջ փոխզիջում է մեր արտաքին քաղաքականության մեջ: Բայց ռուսական մամուլում դա արձագանք չգտավ: Կարծում եմ՝ Ռուսաստանի հետ կապված խնդիր ունենք. այդ երկիրն ուրիշ կերպ է պատկերացնում գործընկերությունը»:
Ա. Բաղդասարյանը նույնպես կարծիք հայտնեց, որ վերջին շրջանում ռուսական մեդիադաշտի պահվածքը վկայում է, որ հայ-ռուսական հարաբերություններում խնդիրներ կան, և Ռուսաստանի վերաբերմունքը Հայաստանի նկատմամբ փոխվել է. «Ռուսաստանը փորձում է սիրաշահել Ադրբեջանին, սերտացնել նրա հետ հարաբարությունները… Հայաստանում էլ համարժեքորեն կփոխվի Ռուսաստանի նկատմամբ վերաբերմունքը և կթուլանա նրա նկատմամբ վստահությունը՝ որպես դաշնակցի»:
«Պետական մակարդակով ասվեց, նաև ոչ պետական մակարդակով պետք է ասենք, որ Ռուսաստանը մեր վերաբերմունքն իր նկատմամբ վատացնում է: Խնդիրը հայ-ռուսական հարաբերություններում անվստահությունը հաղթահարելն է և հայ-ռուսական հարաբերությունները վասալային հարաբերություններից բարձրացնելը գործընկերային, իրավահավասար, արժանապատիվ հարաբերությունների: Դա պետք է փորձենք իրականացնել ոչ թե հակահարված հասցնելով ու առճակատմամբ, այլ դիվանագիտական, քարոզչական աշխատանք տանելով»,- ընդգծեց Ա. Բաղդասարյանը:
Մանրամասն՝ տեսանյութում:
