Չնայած Apple ընկերության մեծ վերելքին, որ նկատվում է վերջին մի քանի տարիների ընթացքում, երբ ընկերությանը հաջողվում է հսկայական եկամուտներ ապահովել, այդուհանդերձ, նրա հաջողության բանաձևում կա մի մեծ բաց, որը կարող է կործանել ընկերությանը: Այս մասին հայտարարել է փորձագետ Փոլ Հոքմանը, որը մեծ փորձ ունի ՏՏ ոլորտում, իսկ հիմա զբաղեցնում է NBC հեռուստաալիքի Today ծրագրի տեխնիկական տնօրենի պաշտոնը:
Ըստ մասնագետի՝ Apple-ին կկործանի նրա փակ համակարգը: Այս մասին Հոքմանն ասել է Forward with Ford 2011 կոնֆերանսի ժամանակ, որը նվիրված է համաշխարհային ամենավառ գործընթացներին: Այս մասին հաղորդում է Pocket-lint կայքը:
Apple-ի փակ համակարգը ենթադրում է, որ Apple-ի հավելվածների խանութն ամբողջությամբ վերահսկվում է ընկերության կողմից, օպերացիոն համակարգը Apple-ինն է, իր սարքերի համար Apple-ն առաջարկում է իր իսկ կողմից մշակված iTunes հավելվածների խանութը և այլն: Հոքմանը սրանից եզրակացնում է, որ այս մոդելը չի կարող երկար գոյատևել, ինչպես և ցանկացած փակ համակարգ: Այդպես է բնության մեջ,- ասել է մասնագետը:
Մոնոպոլ այս դիրքերը բազմիցս քննադատության են ենթարկվել մրցակիցների կողմից: Սակայն Apple-ում ասում են, որ հենց այս համատարած վերահսկողությունն է թույլ տվել ստեղծել այնպիսի սարքեր, ինչպիսիք են iPhone-ն ու iPad-ը:
