Թուրքական Zaman թերթի փոխանցմամբ՝ այն բանից հետո, ինչ 2005 թվականին ԵՄ-ը որոշեց անդամակցության վերաբերյալ բանակցություններ վարել Թուրքիայի հետ, այնպես չէր պատահել, որ Թուրքիան մեկ տարվա ընթացքում որևէ առաջընթաց չգրանցեր այդ գործընթացում։
Այսօրվանից ԵՄ-ի նախագահությունը 6 ամսով ստանձնում է Լեհաստանը, ինչը մեծ հույսեր է առաջացրել թուրքական կողմի մոտ։ Բելգիայի ու Հունգարիայի նախագահության ժամանակաշրջանում՝ մեկ տարվա ընթացքում, ԵՄ-ի չափորոշիչների հարցում անգամ մեկ «գլուխ» չբացվեց։
Այս կապակցությամբ թուրք չինովնիկները նշում են, որ իրենք շատ ջանք գործադրեցին, սակայն ամեն ինչ զուր անցավ։ Այժմ մինչև 2012 թվականի հունվարի 1-ը ԵՄ-ում նախագահելու է Թուրքիայի բարեկամ Լեհաստանը, որին հաջորդելու են Թուրքիայի հետ բարյացակամ հարաբերություններ չունեցող Դանիան և Կիպրոսը։ Այսինքն՝ Թուրքիայի համար մեծ կարևորություն է ներկայացնում Լեհաստանի նախագահության ժամկետը։
Հիշեցնենք, որ Թուրքիային ԵՄ-ին անդամակցելու թեկնածու երկրի կարգավիճակ շնորհվել է 1999 թվականի դեկտեմբերի 10-ին Հելսինկիում տեղի ունեցած ԵԽ-ի գագաթնաժողովում: 2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին:
Այդ օրը ԵՄ անդամ երկրները Լյուքսեմբուրգում երկարատև քննարկումներից հետո ընդունեցին Թուրքիայի հետ բանակցություններ սկսելու որոշում: Այդ ժամանակ Թուրքիայի արտաքին գործերի նախարար (ներկայումս Թուրքիայի 11-րդ նախագահ) Աբդուլլահ Գյուլը հայտարարեց, որ Թուրքիան հասցրեց նստել մեկնող գնացքը։
ԵՄ-ը Թուրքիայից պահանջում է իրագործել 35 «գլուխներում» նշված բարեփոխումները։ 2010 թվականի նոյեմբերի 9-ին հրապարակված ԵՄ-ի ընդլայնման Թուրքիայի մասին 13-րդ զեկույցում նշված էր, որ Թուրքիան կատարել է այդ 35 «գլուխներից» միայն մեկը, քայլեր է ձեռնարկել 13-ի ուղղությամբ և անուշադրության է մատնել մնացած 21-ը: Վերջիններից 18-ը գտնվում են սառեցված վիճակում։
