ԱՄՆ-ի պետքարտուղար Մայք Փոմպեոն հայտարարել է, որ Մերձավոր Արևելքում խաղաղությունն ու կայունությունը անհնարին են առանց Իրանին դիմակայելու:
Փոմպեոն Իսրայելի վարչապետ Բենիամին Նաթանյահուի հետ միասին լրագրողներին է մոտեցել մերձավորարևելյան խորհրդաժողովի ընթացքում, որն ամերիկացիները կազմակերպել են Վարշավայում, և որն ընկալվում է որպես հնարավոր հակաիրանական կոալիցիայի ուժերի ստուգատես:
«Անկարելի է Մերձավոր Արևելքում խաղաղության ու անվտանգության հասնել առանց Իրանին դիմակայելու: Դա պարզապես անհնարին է»,- ասել է Փոմպեոն՝ հիշատակելով Լիբանանում, Եմենում, Սիրիայում և Իրաքում Իրանի «չարանենգ ազդեցության» մասին:
Նաթանյահուն «պատմական բեկումնային պահ» է համարել Վարշավայի համաժողովը, որին մասնակցում են հիմնական արաբական երկրների պատվիրակությունները, այդ թվում՝ այնպիսիք, որոնք դիվանագիտական հարաբերություններ չունեն Իսրայելի հետ: «Իսրայելի վարչապետը և առաջատար արաբական երկրների արտաքին գործերի նախարարները կանգնել էին միասին և անսովոր ուժով, պարզորոշությամբ և միասնությամբ հանդես էին գալիս իրանական ռեժիմի ընդհանուր սպառնալիքի դեմ»,- ասել է նա: Նաթանյահուն շնորհակալություն է հայտնել Փոմպեոյին հանդիպման կազմակերպման համար և կոչ է արել նման փոխգործակցությունը շարունակել «այլ ձեւաչափերով, այլ ուղիներով, բայց և նույն նպատակով»:
Իրանը հանդիպմանը մասնակցելու հրավեր չի ստացել: Մինչդեռ ԱՄՆ-ի Պետդեպարտամենտի պաշտոնյան ընդգծել է, որ Վարշավայի խորհրդաժողովը հակաիրանական բնույթ չի կրում: Իրանի արտաքին գործերի նախարար Մոհամադ Ջավադ Զարիֆը «մեռելածին» է որակել Վարշավայում Մերձավոր Արևելքին նվիրված խորհրդաժողովի կազմակերպումը: Ավելի վաղ ՌԴ ԱԳ նախարարությունը հայտնել է, որ Ռուսաստանը չի մասնակցելու Վարշավայի խորհրդաժողովին, որը «նախապատրաստվում է հապճեպորեն՝ առանց հաշվի առնելու մերձավորարևելյան և ներտարածաշրջանային ազդեցիկ երկրների կարծիքը», հաղորդել է ՌԻԱ Նովոստին:
