«Վարչապետ Նիկոլ Փաշինյանը հայտարարել էր և մինչև այսօր էլ հայտարարում է, որ Հայաստանը, և ինքն անձամբ, որպես Հայաստանի վարչապետ, Արցախին և արցախահայությանը ներկայացնելու մանդատ չունի բանակցային սեղանի շուրջ, և այդ է պատճառը, որ Արցախը պետք է վերադառնա բանակցությունների սեղանի շուրջ։ Այնուամենայնիվ՝ արցախահայությունը պետք է ներկայացված լինի հավուր պատշաճի, պետք է կարողանա ինքնուրույն պաշտպանել իր իրավունքները, և սա միանգամայն տրամաբանական մոտեցում է։ Ցավոք սրտի, այս մոտեցումն իր համարժեք արտացոլումը չի գտել կառավարության ծրագրում։ Այնտեղ նշվում է, որ Արցախն իր ծանրակշիռ ու կտրուկ խոսքը կարող է ասել միայն բանակցային գործընթացի հանգուցալուծման փուլում։ Ինչը նշանակում է, որ կառավարության ծրագիրը պատրաստողները ենթադրել են, որ որոշ ժամանակ դեռ Հայաստանն ու Ադրբեջանը կշարունակեն երկկողմ բանակցությունները, և ծրագրում հստակ նշված է, որ բանակցությունների ժամանակ Հայաստանի համար առաջնահերթություն են համարվում Արցախի ժողովրդի անվտանգությունն ու Արցախի կարգավիճակի հարցը։ Այս խնդիրներն էլ, ըստ էության, առանձնացնում են Արցախի տարածքային ամբողջականության ապահովման հարցից, ինչը անգամ այս երկու մոտեցումը դարձնում է մի տեսակ օդից կախված և զուրկ է ամուր հիմքից»,- «Առաջին լրատվական»-ի հետ զրույցում ասաց արտակարգ և լիազոր դեսպան, Արցախի նախկին արտգործնախարար Արման Մելիքյանը։
Արման Մելիքյանը նաև հավելեց․ «Ձևակերպումները կարող են տարբեր լինել, երբ անվտանգության կամ կարգավիճակի հարցը կտրում ենք տարածքի հարցից։ Ստացվում է, որ, մեծ հաշվով, գույները մի քիչ խտացվում են, բայց ամեն դեպքում Արցախի ժողովրդին կարող են մի հողակտոր հատկացնել, այն սահմանազատել միացյալ աշխարհից և ասել, որ այստեղ դուք անվտանգ եք, ձեզ էլ տրվում է ինքնավարության մի բարձր կարգավիճակ։ Այդ դեպքում ոչ ոք չի կարող ասել՝ իսկ ինչու հենց այստեղ, որովհետև տարածքը կարող է էապես կրճատվել»։
Մանրամասները՝ տեսանյութում։
