Հայ ազգային կոնգրեսի հանրահավաքը սկսվեց և բացման խոսքով հանդես եկավ Հայկական ժամանակ օրաթերթի գլխավոր խմբագիր, նախկին քաղբանտարկյալ Նիկոլ Փաշինյանը: Նա իր խոսքը սկսեց անդրադառնալով հուլիսի 22-ին ԵԽԽՎ-ում Սերժ Սարգսյանի ելույթին և ընդգծեց, որ Սերժ Սարգսյանը հանդես է եկել Հայաստանի երրորդ հանրապետության ողջ պատմության ընթացքում ամենախայտառակ ելույթով: Փաշինյանը մասնավորապես առանձնացրեց Սերժ Սարգսյանի այն հայտարարությունը, որտեղ վերջինս մասնավորապես նշում է, թե Ադրբեջանը առավելություն կստանա, եթե ռազմական գործողություններ սկսվեն:
«Եթե Հայաստանում որևէ մեկը նման հայտարարություն աներ, իշխանական խոսնակները վրա կտային, կանվանեին թուրքական և ադրբեջանական գործակալ և կհավաքվեին հոշոտելու այդօրինակ հայտարարության հեղինակին: Իսկ հիմա քար լռություն է»,- նշեց Փաշինյանը և հարց բարձրացրեց, թե այդ ո՞ւր մնաց հայկական հաղթական բանակը, որը տարիներ առաջ ջախջախեց ադրբեջանցիներին:
Փաշինյանը նշեց, որ Ադրբեջանի և Եվրախորհրդի առաջև չքմեղանալու փոխարեն, Սերժ Սարգսյանը պետք է պատասխան տա սեփական ժողովրդի առջև:
Փաշինյանը ևս մեկ անգամ շեշտեց, որ ավազակապետական, մոնղոլ-թաթարական իշխանությունը պետք է հեռանա.
«Մեզ հարցնում են, թե հանցագործների հետ բանակցում են, այո, բանակցում են, երբ այդ հանցագործները պատանդ են վերցրած լինում ժողովրդին: Հայաստանում հաստատված ավազակապետությունից պետք է ազատվել երկխոսությամբ, իսկ եթե երկխոսությունը արդյունք չի տալիս, հանցագործներին վնասազերծում ենք գրոհով:
Կերկխոսեն՝ լա՛վ, չեն երկխոսի` մեղքն իրենց վիզը՝ ՀԱԿ-ը տվել է իր գնահատականը: Ավազակապետությունը պետք է վերանա և դրանում այլընտրանք չկա, և մենք ունենք բավարար ուժ դա ի կատար ածելու համար»:
