«Հասար» ՍՊԸ-ի սեփականատեր Սամվել Հարությունյանի պայքարը ընդդեմ «ՀայՌուսգազարդի» այդպես էլ չի գտնում իր հանգուցալուծումը: Շուրջ 7 տարի իր իրավունքների համար պայքարող ֆերմերին չի հաջողվում անգամ դատարանի վճռից հետո ստանալ փոխհատուցում: Նա այսօր լրագրողների հետ հանդիպմանն ասաց, որ «Հայռուսգազարդը» փորձում է իրեն վախեցնել և սնանկացնել: Նա նշեց, որ իր ջերմոցների գազն անջատելու հետևանքով միայն մեկ սեզոնին պատճառվել է 45 մլն դրամի վնաս, իսկ ընդհանուր առմամբ, ըստ դատարանի հաշվարկների, վնասի չափը անցնում է 85 մլն դրամը:
Աուլիսի մյուս բանախոս՝ հասարակական-քաղաքական գործիչ Գուրգեն Եղիազարյանն էլ հավելեց, որ «ՀայՌուսգազարդը» երբ տեսել է, որ ըստ պայմանագրի սխալ է վարվել, երկու տարի հետո՝ 2008 թվականին, կեղծել է պայմանագիրը, բնօրինակի հետ համեմատած՝ կեղծումն ակնհայտ է: «Այդ կեղծված պայմանագիրը վերաքննիչ դատարան է ներկայացվել, որտեղ ավելացվել են համապատասխան կետեր՝ հօգուտ իրենց, որի արդյունքում Վերաքննիչ դատարանը բավարարել է բողոքը, և այժմ ստացվել է այնպես, որ «Հայռուսգազարդը» պարտավորված չէ վնասը փոխհատուցել»:
Սամվել Հարությունյանը վերջում հավելեց նաև, որ մի քանի հոգու պատճառով ամբողջ մի տնտեսություն է կործանվում, որի համար ոչ մեկը չի ուզում պատասխանատվություն կրել: «ՀՀ քաղաքացին մինչև կոկորդը հոգնած է «ապահով» Հայաստանից: Պետությունը նրա համար չէ, որ մարդու հետևից ընկնի տանկերով ու ջնջի նրան: Չէ, պիտի խեղդեն, ձեռքից խլեն, որ մենք ապահով Հայաստանում ապրենք: Դա մեր ապահով Հայաստանի հետ կապ չունի»
