Հայ առաքելական եկեղեցին Տյառընդառաջն սկսելու է տոնել այսօր երեկոյան. մամուլի ասուլիսի ժամանակ այս մասին ասաց տեր Շմավոն քահանա Ղևոնդյանը՝ հավելելով, որ սա, Սիմեոն ծերունու օրինակով, բոլորիս՝ Տիրոջն ընդառաջ գնալու տոն է:
«Այսօր երեկոյան բոլոր եկեղեցիներում կատարվելու է նախատոնակ, խարույկներ են վառվելու, շարականներ են երգվելու: Ինչ վերաբերում է կրակի վրայով թռչելու սովորույթին, ապա այն բացարձակապես հեթանոսական չէ, այլ զուտ ժողովրդական ավանդույթ, որով ժողովուրդն ուրախանում է: Եկեղեցին դեմ չէ, որ մարդիկ ուրախանան, այնպես որ, կրակ վառելու մեջ հատուկ խորհուրդ չպետք է փնտրել»,- ասաց նա:
Հոգևորականի խոսքով՝ Տյառնընդառաջի տոնին նվիրված բազմաթիվ միջոցառումներ են կազմակերպվելու, Սուրբ Սարգսի անունը կրող բոլոր եկեղեցիներում Սուրբ պատարագ է մատուցելու, կատարվելու է երիտասարդների օրհնության կարգ: «Մենք փորձելու ենք անել ամեն բան, որ հայ երիտասարդը այս տոնն ընդունի և տոնի: Ինչ վերաբերում է Վալենտինի տոնին, ապա մենք պետք է հասկանանք, որ այն, ինչ մերը չէ, ուրեմն մերը չէ: Մեր տոնն ավելի լավն է, հոգեհարազատ, ավելի բովանդալկալից: Այնպես որ ոչ ոքի կապկել պետք չէ: Դրսից բերված տոները բիզնեսի լավ աղբյուր են»,- ասաց տեր Շմավոն քահանա Ղևոնդյանը:
Տյառնընդառաջը հայ առաքելական եկեղեցու տոներից է։ Հայոց եկեղեցին Տյառնընդառաջը տոնում է փետրվարի 13-ին` Քրիստոսի ծննդից (հունվարի 6) քառասուն օր հետո։ Տյառնընդառաջ նշանակում է «ելնել Տիրոջն ընդառաջ»: Տարածված են նաև Տերընդեզ, Տըրընդեզ, Տըրընտես ձևերը:
Ըստ ավանդույթի՝ Մարիամն ու Հովսեփը քառասուն օրական մանուկ Հիսուսին տանում են Տիրոջ տաճար: Նրանց ընդառաջ է գնում Սիմեոն ծերունին, որը չպետք է մահանար այնքան ժամանակ, քանի դեռ չէր տեսել Փրկչին: Ընդառաջ գնալով Մարիամին ու Հովսեփին՝ Սիմեոն ծերունին գրկում է երեխային: Այստեղից էլ տոնն ստացել է Տյառնընդառաջ՝ Տիրոջն ընդառաջ անունը:
