Հայաստանի Հանրապետության վարչապետ Նիկոլ Փաշինյանը Գերմանիա կատարած պաշտոնական այցի ընթացքում հարցազրույց է տվել գերմանական հանրային հեռարձակող «Դոլչե Վելե»- ին, որի ընթացքում ներքին և արտաքին քաղաքականությանն առնչվող մի շարք հարցերի է անդրադարձել: Հարցազրուցավարը օրինակ է բերել Ուկրաինայի նախկին նախագահ Վիկտոր Յանուկովիչին՝ ասելով, որ նա փորձեց երկու դաշտում խաղալ՝ հարաբերություններ կառուցել և՛ Ռուսաստանի, և՛ ԵՄ-ի հետ, բայց նրան չհաջողվեց, և հարցրեց, թե ինչու է Ն. Փաշինյանին թվում, թե դա Հայաստանին կհաջողվի:
«Առաջին լրատվական»- ի հետ զրույցում անդրադառնալով այս դիտարկմանը՝ ԱԺ պատգամավոր Սոս Ավետիսյանը նկատեց. «Ուկրաինայում «Ռուսաստան թե Արևմուտք» հարցադրումը մշտապես սուր է դրված եղել, Հայաստանում պատմականորեն այդպիսի հարցադրում չի եղել, և այժմ էլ արտաքին քաղաքական վեկտորի էական փոփոխություն չկա: Հայաստանը կարողացել է և՛ Ռուսաստանին, և՛ ԵՄ-ին բացատրել իր աշխարհաքաղաքական իրվիճակը և արժեքային նորմատիվային բազայի փոփոխության անհրաժեշտությունը: Յանուկովիչի խնդիրն այն էր, որ կային հստակ պայմանավորվածություններ, որոնք նրան մանևրելու տեղ չէին տալիս»:
Քաղաքագետ Ռուբեն Մեհրաբյանի դիտարկմամբ՝ Յանուկովիչի հետ համեմատությունը խիստ ոչ կոռեկտ էր՝ թե՛ մեթոդաբանական, թե՛ քաղաքական տեսակետից: Նրա խոսքով՝ համեմատության եզր չկա Յանուկովիչի տարած քաղաքականության և այն քաղաքականության միջև, որը փորձում է այսօր վարել Հայաստանը:
«20 տարվա աղբը, որ կուտակվել է Հայաստանի արտաքին քաղաքականության մեջ, մի քանի ամսվա մեջ մաքրել հնարավոր չէ, բայց կիրառելի է, որ մի ուղղությունը չլինի մյուսի հաշվին: Մենք շատ մեծ աշխատանք ունենք կատարելու ռուսների հետ, քանի որ նրանց համար մյուս երկրները կարող են լինել կա՛մ իրենց վասալը, կա՛մ թշնամին, և այդ ընկալումը նրանց ուղեղից հանելը դժվար է լինելու թե՛ Ն. Փաշինյանի, թե՛ այլ հայ քաղաքական գործիչների համար»,- նշեց քաղաքագետը: Նա նաև ընդգծեց, որ Հայաստանի համար արտաքին քաղաքականությունը ոչ պակաս կարևոր է, քան բանակը:
Մանրամասն՝ տեսանյութում:
