Ամերիկյան Freedom House կազմակերպությունը հրապարակել է տարեկան իր զեկույցը, որտեղ տեղ են գտել նաև Հայաստանում անցած տարվա զարգացումները: Ըստ Freedom House-ի՝ Հայաստանը մի շարք այլ երկրների հետ 2018 թվականին արձանագրել է անսպասելի առաջընթաց՝ ժողովրդավարացման տեսանկյունից: Կազմակերպության Եվրասիական տարածաշրջանի գծով տնօրենն ընդգծում է Հայաստանում տեղի ունեցածի ներքաղաքական բնույթը:
Ըստ զեկույցի՝ Հայաստանն ու այն երկրները, ուր 2018 թվականի ընթացքում արձանագրվել են անսպասելի փոփոխություններ, արժանի են հատուկ ուշադրության 2019 թվականի ընթացքում: Կազմակերպությունը կոչ է անում օտարերկրյա դոնորներին առաջնահերթ տեղ տալ երկրների այս ենթախմբին:
Թեմայի շուրջ «Առաջին լրատվական»- ի հետ քննարկմանը մասնակցեցին վերլուծաբան Հակոբ Բադալյանը, «Գելափ ինթերնեյշնլ» հայաստանյան կազմակերպության տնօրեն, սոցիոլոգ Արամ Նավասարդյանը և քաղաքագետ Գոռ Մադոյանը:
«Լավ կլինի, որ դրական միտումը, որ նկատվել է, շարունակական լինի, այլ ոչ թե կապված լինի էյֆորիկ իրավիճակի հետ: Մարդիկ գերսպասումներ ունեն նոր իշխանություններից, դժվար իրականանալի խոստումներ են տրվել»,- նշեց Ա. Նավասարդյանը:
Անդրադառնալով դիտարկմանը, որ Freedom House-ը Հայաստանում 2018-ին 6 միավորի առաջընթաց է արձանագրել, և Հայաստանը դեռևս համարվում է մասամբ ազատ երկիր, Հ. Բադալյանն ընդգծեց, որ առաջին քայլերը կատարված են, բայց Հայաստանը լիարժեք ազատ երկիր կհամարվի, երբ Հայաստանում առաջանա քաղաքական մրցակցության այնպիսի բալանս, որ իշխանությունն ունենա դիրքը զիջելու ռիսկ. «Երբ կառաջանա իշխանության փոփոխության մեխանիզմ, և այդ դեպքում կերևա, թե ազատությունների աստիճանն ինչքանով է ամբողջական ապահովվում: Մինչ այդ իշխանությունը պետք է օգտագործի իր լեգիտիմությունը իրական ռեֆորմներ իրականացնելու համար»:
Անդրադառնալով հայաստանյան հետընտրական իրավիճակին՝ Հ. Բադալյանն ընդգծեց, որ ներքաղաքական կյանքը չի կարող կանգ առնել. «Ամեն ինչը չի ավարտվել դեկտեմբերի 9-ով, այլ նոր է սկսվում, նախկին համակարգի «բզբզոցը» չէր էլ դադարելու, դա ակնկալելի էր»: Վերլուծաբանի խոսքով՝ այս ամենին պետք է հակադրվել նոր գաղափարներով ու նոր օրակարգով. «Այս առումով նոր իշխանությունը պասիվ է: Առայժմ չենք տեսնում այն առանցքային գաղափարական ալիքը, որը պետք է գար իշխանությունից, այն փորձում է պահել միայն Ն. Փաշինյանը: Ա. Նավասարդյանը հավելեց, որ ունենք վակուում. «Ո՞ւր են ընթացիկ իշխանության ծրագրերը, նախաձեռնությունները, որպեսզի մոռանանք նախորդներին և հասկանանք նոր մոտեցումները, նոր զարգացումները»:
Մանրամասն՝ տեսանյութում: