Հռոմի պապ Բենեդիկտոս XVI-ի գահից հեռանալուց մեկ տարի անց նրա օգնական, արքեպիսկոպոս Գեորգ Գենսվայնը The Daily Telegraph-ին պատմել է, թե ինչպես է նախկին հովվապետն անցկացնում ժամանակը թոշակառության ընթացքում:
Կաթոլիկ եկեղեցու ղեկին լինելու վերջին տարիներին 86-ամյա Յոզեֆ Ռատցինգերը լուրջ առողջական խնդիրներ ուներ, սակայն այժմ, Գենսվայնի խոսքով՝ նա իրեն լավ է զգում: Նախկին հովվապետը կանոնավոր կերպով վեր է կենում առավոտյան 6:30-ին, ամեն օր թերթեր կարդում, երեկոյան դաշնամուր նվագում, հանդիպում հին ընկերների հետ ու հեռուստացույցով հետևում նորություններին:
«Պապ Բենեդիկտոսը գտնվում է խաղաղության մեջ Աստծո և ինքն իր հետ»,- հավելել է արքեպիսկոպոս Գենսվայնը: Նրա խոսքով՝ նախկին հովվապետը չի զղջում Սուրբ գահը լքելու իր որոշման համար, իսկ գլխավոր հանձնառությունը համարում է աղոթքի միջոցով Հռոմեա-կաթոլիկ եկեղեցուն և իր իրավահաջորդ Ֆրանցիսկոսին օգնելը:
