Кавказский узел-ի փոխանցմամբ` Ադրբեջանից արտաքսվել է Bloomberg գործակալության լրագրող Դիանա Մարկոսյանը: Որպես Բաքվի օդանավակայանում նրա ձերբակալման, ապա նաև արտաքսման պատճառ է նշվում հավատարմագրի բացակայությունը:
Նրան հրաժարվել են հավատարմագիր տրամադրել հայկական ծագում ունենալու պատճառով: Ադրբեջանի ԱԳՆ-ի մամլո քարտուղար Էլխան Պոլուխովը Bloomberg-ի ղեկավարությանը հայտնել է, որ «Ադրբեջանը փաստացիորեն պատերազմական իրադրության մեջ է գտնվում Հայաստանի հետ» (դե-յուրե երկու երկրները Լեռնային Ղարաբաղի պատերազմից հետո չեն ստորագրել խաղաղության համաձայնագիր): Այդ պատճառով էլ հայկական ծագում ունեցող Մարկոսյանն Ադրբեջանում խնդիրներ կունենար անվտանգության ապահովման հետ: Դրա համար էլ մենք խնդրել ենք նրա փոխարեն ուղարկել մեկ այլ աշխատակից»:
Վերջին ամիսներին սա Ադրբեջանից լրագրողների արտաքսման երրորդ աղմկահարույց միջադեպն է: Մայիսի 23-ին Լեռնային Ղարաբաղ այցելելուց հետո Ադրբեջանն արգելեց Эхо Москвы ռադիոկայանի լրագրող Սերգեյ Բունտմանի մուտքն Ադրբեջան:
Ապրիլին էլ Ադրբեջանը վճռեց արտաքսել շվեդ լրագրողներին, որոնք մեղադրվել են ընդդիմության չարտոնված ակցիաների նկարահանումների մեջ:
