Արարատի մարզի Արտաշատ քաղաքում, ինչպես տեղեկացրել էինք, հուլիսի 3-ին համայնքի ղեկավարի ընտրություններ են, և գործող քաղաքապետ Գագիկ Մուրադյանը արդեն չորրորդ անգամ է առաջադրում իր թեկնածությունը քաղաքապետի պաշտոնում: Նրանից բացի, առաջադրվել են ևս հինգ թեկնածուներ, որոնց հետ քաղաքապետը ընտանիքով մոտ է: Սակայն ներկա պահին մնացել են երկուսը:
Հիշեցնենք, որ առաջադրված մյուս թեկնածուներն են՝ Մեսրոպ Պետրոսյանը, որը չի աշխատում, ԴՈՍԱԱՖ-ի պետ Հարություն Մնացականյանը, ում հովանավորում է ԲՀԿ-ն, Բանգլադեշի Թաթուլով հայտնի Թադևոս Թադևոսյանը, ով հացի արտադրամաս ունի, «Բերդի նախկին կլյուչնիկ» մականունով հայտնի Քաջո Գրիգորյանը և ԴԱՀԿ Արարատի մարզային բաժնի պետ, արդարադատության կապիտան Վարդան Մնացականյանը, ով վայելում է ոստիկանապետ Ալիկ Սարգսյանի հովանավորությունը: Այս ընտրապայքարում հատկանշական էր այն հանգամանքը, որ նախորդ ընտրության ժամանակ քաղաքապետը մրցակից չի ունեցել, այնինչ այս անգամ նրանք թվով 5-ն էին: Բայց արի ու տես, որ դեռ մի կարգին պայքարի մեջ չմտած՝ 6 թեկնածուներից 4-ը ինքնակամ հետ են կանգնել ընտրապայքարից: Ստացվում է, որ ներկա պահին ընտրապայքարի մեջ են մնացել գործող քաղաքապետ Գագիկ Մուրադյանը և «Բերդի նախկին կլյուչնիկ» մականունով հայտնի Քաջո Գրիգորյանը:
Հիշեցնենք նաև, որ քաղաքապետը մեզ հետ զրույցում հավատացրել էր, որ բոլոր թեկնածուներին էլ ճանաչում է անձնապես, որովհետև բոլորը տեղացի են՝ արտաշատցիներ, բոլորի մասին էլ շատ դրական կարծիքի է, ոչ մեկի հետ կապված ոչ մի խնդիր չունի, նորմալ հարաբերությունների մեջ է: Հավաստիացրել էր նաև, որ ընտրությունների պատճառով ընտանիքներով չեն թշնամանա՝ միաժամանակ չկարողանալով հասկանալ, թե ինչու են իր ընկերները դուրս եկել իր դեմ ընտրապայքարի: Ամեն դեպքում, ինչպես նրանց առաջադրումն էր անհասկանալի, այնպես էլ ճանապարհի կեսից ընտրապայքարից դուրս գալը: Հետևաբար հերթական անգամ զրուցեցինք քաղաքապետի հետ՝ հասկանալու համար, թե 4 թեկնածուները ինքնակա՞մ են դուրս եկել ընտրապայքարից, թե՞ նրանց դրդել են այդ քայլին: Մեզ հետ զրույցում գործող քաղաքապետը վստահեցրեց, որ ոչ մեկին ոչ մի բան չի ասել, ուստի չի կարող ասել, թե ինչու են 4 թեկնածուները դուրս եկել պայքարից: Ի դեպ, խոսակցություններ կան, որ մինչև հուլիսի 3-ը իր թեկնածությունը կհանի նաև Քաջիկ Գրիգորյանը, ինչպես դա տեղի ունեցավ նախորդ ընտրությունների ժամանակ, սակայն քաղաքապետը այդ վարկածը հիմնավոր չհամարեց և նշեց, որ անձամբ ինքը նման բան չի լսել:
Մենք զրուցեցինք նաև ընտրապայքարում հաղթելու ամենամեծ հավանականություն ունեցող ԴԱՀԿ Արարատի մարզային բաժնի պետ, արդարադատության կապիտան Վարդան Մնացականյանի հետ՝ պարզելու համար, թե ինչու է դուրս եկել ընտրապայքարից, այն էլ՝ այն պարագայում, երբ ուներ ե՛ւ ՀՀ ԱԺ նախագահ Հովիկ Աբրահամյանի, ե՛ւ ՀՀ ոստիկանապետ Ալիկ Սարգսյանի հովանավորությունը, ովքեր մտերիմ են նաև քաղաքապետի հետ: Վարդան Մնացականյանը մեզ հետ զրույցում պատճառաբանեց, թե պարզապես չի ցանկանում պայքարել, նույնիսկ չի ցանկացել գրանցվել: Այն դիտարկմանը, թե ստացվում է, որ կային մարդիկ ովքեր ցանկանում էին իրեն տեսնել քաղաքապետի պաշտոնում, իսկ ինքը չէր ցանկանում՝ ասաց. «Այո, այո»՝ հավելելով, որ ցանկացողը ժողովուրդն էր:
Հիշեցնենք, որ ԴԱՀԿ Արարատի մարզային բաժնի պետ Վարդան Մնացականյանը խնամիական կապեր ունի ՀՀ գյուղատնտեսության նախարար Սերգո Կարապետյանի հետ: Կարապետյանի դուստրը Վարդան Մնացականյանի եղբոր կինն է: Վարդան Մնացականյանը քավոր-սանիկական կապերի մեջ է նաև Արարատի նախկին մարզպետ Վարդգես Հովակիմյանի հետ: Ավելին, նրա պապը՝ Վազիկ Մնացականյանը, խորհրդային տարիներին Արտաշատի գինու գործարանի տնօրենն է եղել:
Ակնհայտ էր, որ թեկնածուները չեն ցանկանում խոսել իրենց թեկնածությունը հանելու իրական պատճառների մասին, ուստի ստեղծված իրավիճակի դրդապատճառները հասկանալու համար դիմեցինք իշխանական մեր աղբյուրներին: Նրանց փոխանցմամբ, նախընտրական շրջանում ավելորդ կրքեր չբորբոքելու համար «Հանրապետական» կուսակցության վերնախավը որոշում է կայացրել, որ թեկնածուների թիվը նոսրանա: Հատկապես այն դեպքում, երբ բոլոր թեկնածուներն էլ վայելում են իշխանության հովանավորությունը, և քաղաքապետի պաշտոնին հասնելու համար, կարելի է ասել, բոլորն էլ հավասար շանսեր ունեն: Հետևաբար՝ գործող քաղաքապետի հետ ընտրապայքարում որոշվել է, որ պայքարը շարունակի ամենաքիչ ձայներ հավաքելու շանսեր ունեցող թեկնածուն, որը այս դեպքում Քաջո Գրիգորյանն է: Հիշեցնենք, որ գործող քաղաքապետը «Հանրապետական» կուսակցության անդամ է և գլխավորում է կուսակցության Արտաշատի կառույցը: