Յոթերորդ գումարման ԱԺ նիստն արդեն որոշ գնահատականներ հնչեցնելու հնարավորություն է ընձեռում: Մի բան, թերևս, կարևոր է՝ խորհրդարանը, որի գերակշիռ մասը նոր է, երկրի գլխավոր քաղաքական հարթակի վերածվելու հույսեր է ներշնչում:
Յոթերորդ գումարման ԱԺ նիստերն ընթանում են աղմկահարույց ելույթներով: Անդրադառնալով այս դիտարկմանը՝ «Առաջին լրատվական»- ի հետ քննարկմանը «Իմ քայլը» խմբակցության պատգամավոր Անուշ Բեղլոյանը նշեց. «Այսօր տեսնում ենք խորհրդարանական բանավեճ, ռեալ դիսկուրս՝ տարբեր արտացոլումներով: Այսպիսի թեժ բանավեճերը, որին ականատես եղանք այսօր, միայն Հայաստանին չեն բնորոշ… Ըստ իս՝ մեր խորհրդարանն առանձնանում է շատ թարմ, եռանդուն, բովանդակալից, գուցե մի քիչ դեռևս չկայացած խաղի կանոններով, բայց դա շատ շուտ կշտկվի: Մենք կունենանք կենդանի ԱԺ, բանիմաց ընդդիմություն»:
ԲՀԿ խմբակցության Գևորգ Պետրոսյանը, անդրադառնալով ԱԺ արտաքին հարաբերությունների հանձնաժողովի հետ կապված հարցի շուրջ կրքերի բորբոքմանը, նշեց. «Խնդիրը ես չեմ կապի արտաքին հարաբերությունների հանձնաժողովի հետ: Երբ մեր գործընկեր պարոն Բաբաջանյանն իր ելույթում անցավ անհատական վկայակոչումների՝ ոչ գովեստի խոսքերով վկայակոչելով նաև Ուկրաինայում ՀՀ նախկին դեսպան Ա. Մանուկյանի անունը, հավանաբար չգիտեր, որ այնտեղ է նրա որդին: Ես այդ միջադեպը սկանդալ չեմ համարում, այն վերագրում եմ անձնական ընկալմանը, ոչ թե քաղաքական ուժերի փոխադարձ հարաբերություններին… Մենք ԱԺ-ում չենք հայտնվել իրար «գնդակոծելու», անտեղի, անպտուղ հակամարտության մեջ մտնելու համար… Մենք ունենք վեճի մի առարկա՝ մենք մի խնդիր ունենք՝ ժողովուրդը չհիասթափվի, այլ ոգևորվի մեր աշխատանքից»:
«Լուսավոր Հայաստան» խմբակցության պատգամավոր Գևորգ Գորգիսյանի գնահատմամբ՝ ԱԺ-ում Արման Բաբաջանյանի այսօրվա ելույթն ամբողջությամբ քաղաքական էր:
Մանրամասն՝ տեսանյութում:
