Microsoft ընկերությունը արհեստական ինտելեկտի և իրերի ինտերնետի առաջին լաբորատորիան կբացի Ասիախաղաղօվկիանոսյան տարածաշրջանում, որը կտեղակայվի Շանհայում: Ռազմավարական համագործակցության վերաբերյալ համապատասխան հուշագիրը, ինչպես հունվարի 16-ին հայտնում Է «Սինհուա» գործակալությունը, ստորագրվել Է ընկերության և Շանհայի Պուդուն նոր շրջանի միջև՝ տեղեկացնում է TASS-ը։
Լաբորատորիայի բացումը, որն աշխարհում երրորդը և խոշորագույնը կդառնա Microsoft ընկերության համար, պլանավորված է այս տարվա ապրիլին: Երկու այդպիսի լաբորատորիաներ արդեն գործում են Սիեթլում և Մյունխենում: Շանհայի լաբորատորիան, ընկերության հայտարարության համաձայն, մասնավորապես, տեղի և միջազգային ընկերությունների հետ կաշխատի նախատիպերի ստեղծման ուղղությամբ, կիրականացնի մասնագետների տեխնիկական ուսուցում և կոնսուլտացիաներ կտրամադրի շուկայի վերաբերյալ:
Գործակալության հաղորդման համաձայն՝ լաբորատորիան կոչված է առաջ մղելու արհեստական ինտելեկտի տեխնոլոգիաների ինտեգրումը իրերի ինտերնետի հետ, ինչպես նաև նպաստելու այնպիսի ինդուստրիաների թվայնացմանը, ինչպիսիք են արտադրությունը, մեծածախ առևտուրը, առողջապահությունը և պետական ծառայությունների հատվածը:
«Չինաստանն ունի իրերի ինտերնետի ամենամեծ շուկան: Արհեստական ինտելեկտը և իրերի ինտերնետը հսկայական ներուժ ունեն Չինաստանում»,- գործակալությունը մեջբերում է այս երկրում Microsoft-ի ներկայացուցչության փոխնախագահ Կան Ժունի խոսքը:
Պուդունի շրջանում, որը քաղաքի բարձրտեխնոլոգիական ֆինանսական կենտրոնն է, աշխատում են 100-ից ավելի ընկերություններ ու կազմակերպություններ, որոնք զբաղվում են արհեստական ինտելեկտի տեխնոլոգիաներով։
