ԱՄՆ պետքարտուղար Մայք Պոմպեոն կողմ է հանդես եկել Սիրիայի քաղաքական կառույցների ձևավորման գործընթացներին Ասադի կառավարության մասնակցությանը՝ այդ երկրում զինված հակամարտության ավարտից հետո: Այս մասին հայտարարել է Fox News ամերիկյան հեռուստաալիքը, որը ուրբաթ օրը հրապարակել է ԱՄՆ պետքարտուղարի հետ հարցազրույցը:
Պոմպեոյի հայտարարություններն արվել են ի պատասխան այն հարցին՝ արդյոք կիսում է ԱՄՆ պետքարտուղարի պաշտոնում իր նախորդի՝ Ռեքս Թիլերսոնի կարծիքը, որը անցյալ տարվա հոկտեմբերին հայտարարել էր, որ Բաշար Ասադը Սիրիայում քաղաքական ապագա չունի: Միևնույն ժամանակ, Պոմպեոն բացասական է որակել Մերձավոր Արևելքի տարածաշրջանում Ռուսաստանի և Իրանի դերը:
«Մենք ցանկանում ենք բոլոր ջանքերը գործադրել, որպեսզի բոլոր տարբերակները բաց լինեն այն դեպքում, երբ կսկսեն քաղաքական քննարկումները»,- հայտարարել է Մայք Պոմպեոն։
«Մենք մեծ հույս ունենք, որ կկարողանանք սեղանի շուրջ հավաքել տարածաշրջանի բոլոր վատ դերակատարներին, ռուսներին և իրանցիներին, ինչպես նաև Ասադի կառավարության վարչակազմին և մյուս բոլոր շահագրգիռ կողմերին, որպեսզի նրանք հանդիպեն և զրուցեն, թե ինչպիսին կարող են լինել Սիրիայում քաղաքական կառույցները քաղաքացիական պատերազմից հետո»,- ասել է ԱՄՆ պետդեպարտամենտի ղեկավարը:
Պոմպեոն նաև ասել է, որ փետրվարի 13-14-ը Միացյալ Նահանգները նախատեսում է բարձր մակարդակի միջազգային հանդիպում կազմակերպել Լեհաստանում՝ մեխանիզմներ մշակելու Մերձավոր Արևելքում իրավիճակի կայունացման համար և, մասնավորապես, քննարկելու տարածաշրջանում Իրանի ազդեցության սահմանափակման հարցը, որը նա բնութագրել է որպես ապակայունացնող։