Հետընտրական ներքաղաքական զարգացումների վերաբերյալ գնահատականները դիտարկվում են հիմնականում երկու տիրույթում՝ խորհրդարանական և արտախորհրդարանական: Ընդ որում, ինչպես հայտնի է, շատ գնահատականների համաձայն, հիմնական զարգացումները լինելու են արտախորհրդարանական դաշտում, համարելով, որ խորհրդարանում 70 տոկոս մեծամասնությունը կծածկի ամեն ինչ, կամ որ ընդդիմությունը դիրքավորված չէ արմատական կոշտությամբ: Այստեղ հարկ է ուշադրություն դարձնել մի շատ կարևոր հանգամանքի վրա: Իսկ ո՞վ է չափել նոր իրավիճակում ընդդիմության պահանջարկի այսպես ասած բովանդակությունը: Ինչ է դա իրենից ներկայացնում: Թեմայի շուրջ «Առաջին լրատվական»- ի հետ քննարկմանը մասնակցեցին քաղտեխնոլոգ Արմեն Բադալյանը, քաղաքագետներ Արմեն Վարդանյանը և Նժդեհ Հովսեփյանը:
Քննարկման մասնակիցների կարծիքով՝ այսօր միասնական ընդդիմության և արմատական պայքարի կարիք չկա: «Այնպես չէ, որ կառավարությանը հակադրություն չկա ԱԺ-ում. եթե կառավարությունը բերի այնպիսի օրենք, որը կհակասի իրենց ընտրազանգվածի շահերին, ԲՀԿ-ն և ԼՀԿ-ն կընդդիմանան, կոշտ քննադատությամբ հանդես կգան և դեմ կքվեարկեն»,- նշեց Ա. Բադալյանը՝ հավելելով, որ ընդդիմության դերը վերջին շրջանում գերագնահատվում է: Նրա խոսքով՝ երբ քրեաօլիգարխիկ համակարգը դուրս եկավ քաղաքական դաշտից, ժողովուրդը բաժանվեց ընտրազանգվածների, և քաղաքական յուրաքանչյուր ուժ իր ընտրազանգվածի շահերը պետք է ներկայացնի, ոչ մի ուժ չի կարող ամբողջ ժողովրդի շահերը ներկայացնել:
Նժդեհ Հովսեփյանի դիտարկմամբ՝ ԱԺ փոխնախագահի պաշտոնի համար ԲՀԿ-ի և ԼՀԿ-ի միջև մրցակցություն է: Ա. Վարդանյանի խոսքով՝ ԲՀԿ-ն և «Լուսավոր Հայաստանը» նախընտրական շրջանում արդեն նշաձող էին սահմանել, որ իրենք պետք է լինեն երկրորդ կուսակցությունը. «Նրանց միջև պայքարը նաև սրանից եկավ, բայց հիմա դա անիմաստ պայքար է, քանի որ ընտրություններն ավարտվել են, և ինչպես ասում են՝ կռվից հետո բռունցքներ չեն թափահարում: ԲՀԿ-ն և «Լուսավոր Հայաստանն» արդեն իրենց ուշադրությունը պետք է սևեռեն «Իմ քայլը» դաշինքի վրա, սկսեն քննադատել իշխանությանը և ներկայացնել այլընտրանքային ծրագրեր»:
Անդրադառնալով դիտարկմանը, որ «Լուսավոր Հայաստան»- ը հայտարարել է, որ այս խորհրդարանում ընդդիմությունը մեկն է, իսկ ԲՀԿ-ն լռում է, և անհասկանալի է, թե ինչու ԲՀԿ-ն չի մտնում այդ պոլեմիկայի մեջ, Ն.Հովսեփյանն ընդգծեց. «ԲՀԿ-ն ճիշտ կանի չմտնի պոլեմիկայի մեջ, որովհետև նա պարտված է: ԲՀԿ-ն, որպես քաղաքական միավոր, շատերի համար ընկալելի չէ, որովհետև ոչ մի առանցքային հարցում դիրքորոշում չի ներկայացրել, մշտապես եղել է բուֆերային գոտի նախկին իշխանությունների համար ընդդիմության հետ հարաբերությունները պարզելու տեսանկյունից»:
Մանրամասն՝ տեսանյութում:
