«Ամեն տարի Ամանորից հետո ականատես ենք լինում ռասիզմի յուրօրինակ մի դրսևորման, ու հիմա էլ կենտրոնացել են հնդիկների վրա, սակայն այդ տրամադրությունները Հայաստանի ամբողջ բնակչությանը չեն վերաբերում»,- «Առաջին լրատվական»-ի հետ զրույցում ասաց լրագրող, վերլուծաբան Կարպիս Փաշոյանը:
Նրա խոսքով՝ կա մի փոքրամասնություն, որն առաջնային պլան է մղում ռասիզմը, այլատյացությունը և ֆաշիստական այլ դրսևորումներ. «Իրականում այդպիսի խնդիր չկա, և այդ մարդիկ անհարկի աղմուկ են բարձրացրել: Նրանք իրենց ենթագիտակցության մեջ դեռևս ապրում են օսմանյան կայսրության տիրապետության տակ՝ շրջափակված և իրենց նեղ ադաթներով: Ի պատիվ մեզ՝ Հայաստանի բնակչության մեծամասնությունը զերծ է մնում այդպիսի վնասակար գաղափարներից, բայց մենք չենք կարող կանխատեսել, թե ինչ կլինի ապագայում»:
Մեր զրուցակիցը այս ամենը զավեշտալի է համարում, որովհետև, նրա խոսքով, հայկական արժեքների մի զգալի մասը ստեղծվել է Հնդկաստանում՝ Կալկաթայում, Մադրասում. «Հայկական մամուլի առաջին դրսևորումները հենց Մադրասում են եղել: Եվ հիմա էլ հայերը Հնդկաստանում մեծ ներկայացվածություն ունեն. հիմա ի՞նչ՝ նրանք էլ մեր դե՞մ ստորագրահավաք կազմակերպեն: Գործ ունենք հետադիմության և երեսպաշտության հետ. գոնե մենք այդպիսի խնդիր չպետք է բարձրացնեինք»:
Կարպիս Փաշոյանի կարծիքով՝ այդ փոքրամասնությունը կռիվ է տալիս հողմաղացների դեմ. «Նրանց թվում է, թե հայ ազգին ուզում են ոչնչացնել, թե մեզ ինչ-որ անտեսանելի վտանգներ են սպառնում, և փորձում են պաշտպանվել: Իրականում, սակայն, ոչ մի խնդիր չկա»:
Հարցազրույցն ամբողջությամբ՝ տեսանյութում: