Մինչ Փաշինյան – Պուտին հանդիպումը պաշտոնական Մոսկվան հայտարարում էր, որ երկկողմ հարաբերությունների օրակարգը շատ հարուստ է: «Առաջին լրատվական»- ի հետ զրույցում անդրադառնալով հարցին, թե արդյոք այդ հանդիպումից հետո կա այնպիսի տպավորություն, որ հարուստ օրակարգի շուրջ է եղել զրույցը, վերլուծաբան Հակոբ Բադալյանն ընդգծեց, որ հանդիպումը չէ, որ պետք է ցույց տար հայ – ռուսական հարաբերությունների հարուստ լինելը: «Հայ – ռուսական հարաբերությունների հարստությունը երկար տարիներ ի վեր կուտակվել է, բնականից եկող հարստություն է՝ հաշվի առնելով թե՛ Ռուսաստանի հետաքրքրվածությունը տարածաշրջանային խնդիրներով, թե՛ Հայաստանի դերը և այլն: Ամբողջ խնդիրն այն է, թե այդ հարաբերությունների օրակարգն ինչ բնույթով է սպասարկվելու:
Կարծում եմ՝ հայ – ռուսական հարաբերություններում այն փուլն է, որ պետք է ճշտվի օրակարգի բնույթը: Հայաստանում լիովին այլ իրականություն է, նոր իշխանությունն իր բնույթով ու տեսակով ամբողջապես հակադիր է այն համակարգին ու մտածողությանը, որը կրում է Ռուսաստանի իշխանությունը. այս հակադիր բնույթով երկու բևեռները պետք է գտնեն հարաբերության այն եզրերը, որտեղ ընդհանուր շահեր ունեն և հստակեցնեն միմյանցից ակնկալիքներն ու պարտավորությունները, պատրանքներ չպետք է լինեն: Այդ ամենը կառուցված է լռությամբ քողարկված իրողության վրա, որտեղ թելադրողը մի կողմն է և ասում է բաներ, որոնք երբեմն համընկնում են մեր շահերին, երբեմն ոչ միայն հակառակ են մեր շահերին, այլ նույնիսկ թշնամական են: Բայց մենք լռում ենք կամ բավարարվում ենք կիսաձայն դժգոհություններով»,- նշեց Հակոբ Բադալյանը:
Գերագույն խորհրդի նախկին պատգամավոր Ազատ Արշակյանն ընդգծեց, որ Հայաստանը միակ երկիրն է, որ Ռուսաստանի հետ բարեկամական հարաբերություններ ունի:
Հրապարակախոս Նարինե Դիլբարյանի դիտարկմամբ՝ Նիկոլ Փաշինյանի մոսկովյան այցի ամփոփումը ավելի շատ հարցեր առաջացրեց, և պարզ դարձավ, որ մեր «շերեփն», այնուամենայնիվ, ոչ երկաթից է, այլ դեռևս թղթից: Հ. Բադալյանը հավելեց, որ գուցե Հայաստանի հետ հարաբերությունում Ռուսաստանի «շերեփը երկաթյա է, մերը թղթե», բայց աշխարհի մասշտաբով՝ միջազգային հարաբերություններում արդեն Ռուսաստանի «շերեփն է թղթե»:
Մանրամասն՝ տեսանյութում: