Կառավարությունում այսօր տեղի է ունեցել «Գյուղական կարողությունների ստեղծում» ծրագրի ղեկավար խորհրդի անդրանիկ նիստը, որը վարել է վարչապետ, խորհրդի նախագահ Տիգրան Սարգսյանը։ Այս մասին ասվում է կառավարության տարածած մամլո հաղորդագրությունում։
Նիստում քննարկվել են «Գյուղական կարողությունների ստեղծում» ծրագրի 2011թ. տարեկան պլան-բյուջեն և 2011-2012 թթ. տարեկան գնումների պլանը: «Գյուղական տարածքների տնտեսական զարգացման ծրագրերի իրականացման գրասենյակ» պետական հիմնարկի տնօրեն Սերգեյ Վիրաբյանը մանրամասներ է ներկայացրել 53 մլն ԱՄՆ դոլար արժեքով ծրագրի չորս հիմնական՝ «Աջակցություն մրգի և ընկուզեղենի արտադրության ոլորտին», «Գյուղական ենթակառուցվածքներ», «Ծրագրի կառավարում» և «Այգեգործական վարկեր» բաղադրիչների վերաբերյալ:
Հաջորդիվ ծավալված մտքերի փոխանակության ժամանակ խորհրդի անդամներն իրենց կարծիքներն են հայտնել ներկայացված փաստաթղթերի առնչությամբ: Ամփոփելով քննարկման արդյունքները՝ կառավարության ղեկավարը հանձնարարել է 2011 թ. տարեկան պլան-բյուջեն և 2011-2012 թթ. տարեկան գնումների պլանը լրամշակել արված դիտողություններով ու առաջարկություններով և ներկայացնել խորհրդին:
Խորհուրդը քննարկել է «Գյուղական կարողությունների ստեղծում» ծրագրի բաղադրիչ «Հայկական միրգ» բաժնետիրական ընկերության հիմնադրմանն առնչվող հարցեր:
Նիստի ընթացքում արծարծվել է «Գյուղական տարածքների տնտեսական զարգացման ծրագրերի իրականացման գրասենյակ» ՊՀ գնումների միջգերատեսչական hանձնաժողովի ձևաչափի հարցը:
Ի թիվս այլ հարցերի՝ հաստատվել է «Գյուղական կարողությունների ստեղծում» ծրագրի «Ենթակառուցվածքների վերականգնում» բաղադրիչի շրջանակում 2011-2015 թթ. գազաֆիկացման աշխատանքների իրականացման նպատակով սահմանված կարգով ընտրված համայնքների ցանկը, ինչպես նաև հավանություն է տրվել ՀՀ Վայոց ձորի մարզի Աղավնաձոր և Արփի համայնքներում գազաֆիկացման լրացուցիչ աշխատանքներ իրականացնելու առաջարկին: