Արցախի Հանրապետության Նախագահ Բակո Սահակյանը հունիսի 28-ին Մարտակերտ շրջկենտրոնում մասնակցել է քաղաքի ազատագրման 18-րդ տարեդարձին նվիրված տոնական միջոցառումներին:
Իր խոսքում երկրի ղեկավարը Մարտակերտի ազատագրումը դասել է Արցախյան ազատամարտի կարևորագույն հաղթանակների շարքին՝ հավելելով, որ այսօր էլ պաշտպանության բանակն ի վիճակի է կործանիչ հակահարված տալ հանրապետության ազատությանն ու անկախությանը սպառնացող ցանկացած ոտնձգության:
Բակո Սահակյանը նշել է, որ Մարտակերտի շրջանի զարգացումը հանդիսանում է երկրի սոցիալ-տնտեսական առաջընթացի կարևոր ուղղություններից մեկը, և արվում է հնարավորն այն շենացնելու համար:
Նախագահը նաև պետական պարգևներ է հանձնել Արցախյան ազատամարտի մի խումբ վետերանների:
Տոնական միջոցառումներին մասնակցում էին Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, Ազգային ժողովի պատգամավորներ և կառավարության անդամներ, հյուրեր Հայաստանի Հանրապետությունից: