Բրիտանական էլեկտրոնային հետախուզության՝ «Կառավարական կապի շտաբի» ղեկավարը հայտարարել է իր հրաժարականի մասին: Ինչպես այսօր հաստատել է Թագավորության ԱԳՆ-ն, նա կլքի պաշտոնը արդեն այս տարվա վերջին:
Ինչպես նշում են ԱԳՆ-ում, որոշումը կապված չէ ԱՄՆ հատուկ ծառայությունների նախկին աշխատակից Էդվարդ Սնոուդենի կողմից լրտեսման ծրագրերի բացահայտումների հետ: Այս մասին հայտնում է ITAR-TASS-ը:
ԱԳՆ-ում նշել են, որ Յան Լոբանի հրաժարականը վաղուց ծրագրված քայլ է: Նրա համար պատշաճ իրավահաջորդ են փնտրում: Նա գերատեսչությունը ղեկավարում է 2008-ի հուլիսից:
The Guardian-ը օրերս հայտնել էր, որ ԱՄՆ-ի և Մեծ Բրիտանիայի հատուկ ծառայությունները կիրառում են սմարթֆոնների կիրառական ծրագրերի «խոցելի տեղերը»՝ դրանց տերերին լրտեսելու համար:
Պարբերականը նշում է, որ ԱՄՆ Ազգային անվտանգության գործակալությունում Լոբանի գործընկերն ու նրա տեղակալը նույնպես այս տարի հրաժարական կտան:
