Այսօր առողջապահության նախարար Հարություն Քուշկյանը, մեզ հետ զրույցում անդրադառնալով Գյումրիի շտապ օգնության բրիգադի չարաբաստիկ դեպքին, ասաց, որ ողջ բժշկական հասարակայնությունը և, կարծում է, մեր երկրի յուրաքանչյուր քաղաքացի խիստ դատապարտում են երեկ Գյումրիում շտապօգնության անձնակազմի նկատմամբ կատարված բարբարոսական արարքը, որն ավարտվել է շտապօգնության բժշկի մահվամբ. բժշկի, որը շտապում էր օգնության հասնել հիվանդին:
«Չնայած հիվանդատիրոջ անմարդկային վերաբերմունքին, բժիշկ Աշոտ Գրիգորյանը, հավատարիմ մնալով բժշկի երդմանը, շարունակել է պատշաճ բուժօգնություն ցուցաբերել հիվանդին: Ես, որպես Հայաստանի Հանրապետության քաղաքացի, որպես բժիշկ և որպես առողջապահության նախարար, իմ խորին վիշտը և խիստ վրդովմունքն եմ հայտնում այս երևույթի առնչությամբ: Հավատացնում եմ, որ հետևողական կլինեմ, որպեսզի մեղավորները կրեն արժանի պատիժը՝ Հայաստանի Հանրապետության օրենսդրության համաձայն: Խնդրում եմ բոլոր իրավապահ մարմիններին՝ ամենայն խստությամբ մոտենալ այս զարհուրելի երևույթին: Կարծում եմ՝ իրավապահ մարմինների հետ համատեղ պետք է մշակել համակարգ, որպեսզի բուժաշխատողը մեր երկրում իրեն պաշտպանված զգա: Իմ և ողջ բժշկական հասարակայնության անունից խորին ցավակցություն եմ հայտնում բժիշկ Աշոտ Գրիգորյանի ընտանիքին նրա ողբերգական մահվան կապակցությամբ»,- ավելացրեց Հարություն Քուշկյանը:
