Գյումրիի քաղաքապետ Սամվել Բալասանյանի տան վրա իրականացված հարձակման փաստով արդեն իսկ քրեական գործ է հարուցվել: Իսկ քաղաքապետը նախազգուշացրել է, որ եթե այս անգամ էլ իրավապահները ըստ պատշաճի չզբաղվեն այս գործով և կրկնվեն Սպարտակ Ղուկասյանի այցերը, ապա ինքն արդեն կպատժի նրան:
«…Եթե այս անգամ էլ նորմալ չզբաղվեցին, կամ էլ ինչ-որ բան իրականությանը չհամապատասխանեց, բնականաբար ես խիստ կպատժեմ, ես կանցնեմ պատժի խիստ միջոցների… իսկ որևէ մեկը թող չկասկածի իմ պատիժների վրա, որովհետև ես երբեք Գյումրիի թասիբը չեմ գցել և չեմ գցի… թասիբին պիտի կուլ չգնալ, և եթե չի պատժվում, ես եմ պատժում»: Նա միայն չի մանրամասնել, թե ինչ մեթոդներով է պատժելու կրտսեր Ղուկասյանին: Բալասանյանն իր այս նախազգուշացումով, ըստ էության, հակադարձել է ոստիկանապետ Վլադիմիր Գասպարյանին, ով օրերս Գյումրիում, անդրադառնալով կատարվածին, ասել էր, որ Բալասանյանը կամ վախկոտ է, կամ գողական, որ դեպքից հետո անձամբ հայտարարություն չի տվել ոստիկանություն:
«Առաջին լրատվական»-ը Գյումրիի նախկին քաղաքապետ Վարդան Ղուկասյանից հետաքրքրվեց ծանո՞թ է Բալասանյանի մեթոդներին և չի՞ վախենում որդու համար, որ հանկարծ Բալասանյանն էլ իր «մեթոդներից» կիրառի:
– Չգիտեմ` էտ ինչ մեթոդ ա: Բայց իրա մեթոդներից ես մենակ հիշում եմ, որ ինքն այգուց վազելով փախնում էր հրապարակ, երբ որ մեզ տեսնում էր ջահել վախտը: Մեկ էլ բռնել տալ, կլավուզնիկություն, ստորություն: Ուրիշ մեթոդ մենք չենք տեսել իրանից: Այ, որ ջահել վախտը մեզ տեսնում էր փախնում էր, գոնե էդ հիշի, ոչ թե հելնի շառով տա:
– Ձեր կարծիքով` Բալասանյանը շա՞ռ է անում, ինչպես Դուք եք ասում:
– Միանշանակ, ինքն ամբողջ կյանքն է շառի մեջ: Մեկ էլ իրան խրատ տվողները:
– Արդեն հայտնի է, որ քրեական գործ է հարուցվել: Հնարավո՞ր է Ձեր որդուն պատասխանատվության ենթարկեն:
– Աղջիկ ջան, ինչ քրեական գործ հարուցվել, ինչ բան…ինչ է եղել…: Ինչի՞ վրա է քրեական գործ հարուցվել, եթե նման բան չի եղել: Ես դրան չեմ էլ ուզում անդրադառնալ:
– Այդ դեպքի հետ կապված Ձեր որդին արդեն իսկ բացատրություն է տվել: Բացի այդ, տեսանյութ կա նկարված Բալասանյանի տան տեսախցիկների կողմից: Դրանք Ձեզ համար բավարար հի՞մք չեն:
– Հիմա ինչ, մարդը իրավունք չուներ էդ փողոցը անցներ, մեժդուպռոչեմ` էդ փողոցը ես եմ սարքել, իմ կառուցածն է, էդ քաղաքը իմ կառուցածն է, իմ տղան չի՞ կարող ման գալ: Եթե էդ փողոցով անցնում է, ուրեմն էղավ, որ էկել ա իրա տան վրա հարձակվի հա՞:
– Դեպքի անմիջապես հաջորդ օրը փոխվեց նաև Գյումրիի ոստիկանապետը: Բոլորը վստահաբար պնդում են, որ Բաբակեխյանի փոփոխությունը հենց այդ միջադեպի հետ էր կապված: Իսկ նա հայտնի է, որ Ձեր հետ լավ հարաբերություններ ուներ: Արդյո՞ք այս փաստը ևս չի խոսում Բալասանյանի տան վրա իրականացված հարձակման մեջ Ձեր որդու մասնակցության մասին:
– Ոստիկանապետը գիտի` ինչ է անում ընդհանրապես: Ես չգիտեմ` էս դեպքերի հետ է կապված, թե չէ: Եթե նմանատիպ բան է եղել, ինքը կասի: Բայց ես մի բան գիտեմ, որ էս ամեն ինչը սարքած ա:…Սրանից մի 20 օր առաջ, հիշում եք, սաղ թերթերում, սայտերում քցել էին, թե իբր մեր տունը ստուգում են, իբր ինչ-որ կոնֆլիկտներ են եղել…դա ով էր անողը: Ուղղակի մարդ պետք է պատմություն ունենա ընդհանրապես: Իսկ նենգությամբ, դավաճանությամբ, ստորությամբ ապրող մարդու դիմակը մի օր պատռվում է:
– Իսկ ինչո՞ւ պետք է Բալասանյանը Ձեր մասին սուտ տեղեկություններ տարածեր:
– Իրանց նպատակն այն է, որ մեզ սարքեն կրիմինալ, մեզ ասոցացնեն կրիմինալի հետ, հետո մի հատ դռռոց հանեն վրեքս, խփեն: …4 հոգի մեռավ, մինչև էսօր չբացահայտվավ: Հիմա նորից ինչ-որ բաներ են սարքում, որ ժողովուրդն ասի՝ դե սրանք մշտական կանֆլիկտների մեջ են, դրա համար էլի: Թողեք ապրենք էլի մեզ համար հանգիստ: Ոչ քաղաքականությամբ ենք զբաղվում, ոչ էլ, մենք մեր երկիրը, մեր ազգը սիրող մարդ ենք: Ի՞նչ է, ձեզ ձեռք չի՞ տալիս մարդը, որի հետևից ժողովուրդը գնում ա: Այսինքն` հենց ժողովուրդը մեկի հետևից գնում ա, դրան պիտի վարկաբեկեն, սարքեն ջնջոց: է՞ս է էս երկրի վիճակը:
– Ուզում եք ասել, որ ժողովուրդը Ձե՞ր հետևից է գնում, և եթե այո, ապա կասեք դեպի ուր եք գնում այսպես:
– Բա դու չգիտես` ում հետևից է գնում ժողովուրդը: Էդ ով չգիտեր:
– Իսկ ինչպե՞ս է պատահում, որ հենց Ձեր անունն է տարիներ շարունակ ու մշտապես շրջանառվում տարբեր կրիմինալ դեպքերի, սպանությունների, հարձակումների, վիճաբանությունների կենտրոնում և կազմակերպիչի դերում:
– Այ էդ պատմությունները քեզպեսներն են անում: Դա սարքում են, դիտավորյալ են անում:
