«Առաջին լրատվական»-ի «Մամուլի հետ սուրճ» հաղորդման այսօրվա հյուրն է քաղաքական մեկնաբան Մհեր Ղալեչյանը:
Անդրադառնալով խորհրդարանական ընտրությունների արդյունքների առնչությամբ ԿԸՀ հրապարակած նախնական տվյալներին՝ մեր զրուցակիցն ասաց. «Գլխավոր ինտրիգը թերևս այն էր, թե ՀՀԿ-ն կանցնի՞ արդյոք 5 տոկոսի շեմը: Այսինքն՝ մարդկանց ոչ միայն իրենց քվեն էր հետաքրքրում, այլ որ, իրենց կարծիքով, գլխավոր չարիք ուժը չանցնի այս խորհրդարան: Եվ սա համարվում է ժողովրդի հերթական հաղթանակը»:
Մհեր Ղալեչյանը կարծում է, որ ՀՀԿ-ն պետք է փոխի իր հռետորաբանությունը. «Ես վստահ եմ՝ իրենք չանցան 5 տոկոսը իրենց ոճի պատճառով. ճիշտ մարտավարության դեպքում նրանք կարող էին անցնել խորհրդարան, բայց նրանք գնացին ճիշտ հակառակ ճանապարհով, և դա տապալեց»:
Հանրապետականը պետք է հենվի իր երիտասարդ թևի վրա՝ կարծում է մեր զրուցակիցն ու ասում. «Մի՞թե Հանրապետականում չկային ավելի արժանավոր մարդիկ, քան, ասենք, Հայկ Բաբուխանյանն ու Արտաշես Գեղամյանն էին. սա նվաստացուցիչ էր շատ հանրապետականների համար»:
Մհեր Ղալեչյանը կարևորում է այն հանգամանքը, որ ձևավորվում է այնպիսի խորհրդարան, որը ցանկացել է մեր հասարակությունը, և այլևս հասարակությունը պատասխանատու է այս խորհրդարանի համար, իսկ խորհրդարանական ուժերն էլ իրենց հերթին ավելի պատասխանատու պետք է լինեն ընտրողի հանդեպ. «Այդ կապը արդեն կա, ինչը չկար նախկինում»:
Մանրամասները՝ տեսանյութում:
