Գերմանիայի Ֆուրթվանգեն համալսարանի մանրէաբան Մարկուս Էգերտն առաջին անգամ ուսումնասիրել է ակնոցների միկրոֆլորան: Առողջության համար վտանգավոր մանրէների տեսակարար կշիռը կազմել է 60%՝ տեղեկացնում է Der Standard ավստրիական լրատվամիջոցը:
Հետազոտության շրջանակներում գիտնականը նմուշներ է վերցրել 31 ակնոցներից, որոնք պատկանել են ուսանողների և համալսարանի աշխատակիցների, ինչպես նաև ծերանոցներում ապրող տարեց մարդկանց:
Ըստ Էգերտի՝ ուսումնասիրված բոլոր ակնոցների վրա հայտնաբերվել են մանրէներ: «Մանրէների մեծ մասը գտնվում էր մաշկի հետ անմիջական շփման հատվածներում, օրինակ՝ քունքերի և քթարմատի շրջանում»,- գրում է գիտնականը: Տարեց մարդկանց ակնոցների կամ լինզաների վրա ավելի շատ մանրէներ են հայտնաբերվել, քան երիտասարդների մոտ։ Դա բացատրվում է նրանով, որ տարեց մարդիկ վատ տեսողության պատճառով չեն նկատում, որ ակնոցի ապակիները կամ լինզաները կեղտոտ են, և ուշ-ուշ են մաքրում դրանք։
Ուսումնասիրության ընթացքում հայտնաբերվել են հիմնականում մաշկի և լորձաթաղանթի վրա ապրող տիպիկ բակտերիաներ, հիմնականում ստաֆիլոկոկների ընտանիքից։ Գիտնականի կարծիքով՝ դրանք կարող են տարբեր հիվանդությունների առաջացման պատճառ դառնալ հիմնականում թույլ դիմադրողականություն ունեցող մարդկանց մոտ։
