Վեցերորդ գումարման Ազգային ժողովն իր կարևորագույն դերակատարությունն է ունեցել Հայաստանի համար վերջին քաղաքական իրադարձություններում: Խորհրդարանն իր գործունեությունն իրականացրել է հավուր պատշաճի: ԱԺ փոխխոսնակ Միքայել Մելքումյանը նման տեսակետ հայտնեց այս գումարման ԱԺ-ի չկայացած վերջին հերթական նիստում:
«Այս գումարման Ազգային ժողովը, փաստորեն, իր գործունեությունն իրականացրեց հավուր պատշաճի: Ես գովեստի խոսքեր չեմ ասում, արձանագրում եմ, որ մեր երկրի համար այս բախտորոշ շրջանում, երբ տեղի է ունեցել քաղաքական հեղափոխություն, ԱԺ-ն, բնականաբար, իր կարևորագույն դերակատարությունն է ունեցել: Եվ այս առումով նա կմտնի պատմության տեղեկատվական համակարգի մեջ այն առումով, որ կարողացավ իր գործառույթները պատշաճ, օրենքի շրջանակում իրականացնել»,- ասաց Մելքումյանը:
Նա մաղթեց, որ հաջորդ գումարման ԱԺ-ն նույնպես լինի երկրի զարգացումն ապահովող պետական կառույց: Մելքումյանը կարևորեց խորհրդարանի դերի մեծացումն ու ուժեղացումը, որ այն ունենա իր հավասարակշող և հակակշռող դերակատարությունը:
ԱԺ դեկտեմբերի 7-ի հերթական նիստը չի կայացել քվորում չապահովելու պատճառով:
