«Ես մեկ հարցի իրավունք ունեի, և ում պետք էր՝ ես իմ հարցը տվեցի: Ես ճիշտ էի համարում իմ հարցն ուղղել այն ուժին, որը վերջին տարիներին եղել է երկրորդ քաղաքական միավորը: Այսինքն՝ ես Ծառուկյանին թողած՝ Նիկոլին ի՞նչ հարց պետք է տայի»,- անդրադառնալով երեկ Հանրայինի ուղիղ եթերում ծավալված բանավեճին՝ լրագրողների հետ զրույցում ասաց «Լուսավոր Հայաստան» կուսակցության ցուցակը գլխավորող՝ «Ելք» խմբակցության պատգամավոր Էդմոն Մարուքյանը՝ հավելելով, որ ապագա խորհրդարանում Նիկոլին այնքան հարց կտա:
Նրա խոսքով՝ ՀՀԿ-ի քննադատությունը ուղղակի հայհոյախառն վիրավորանք էր. «Եվ եթե դա է ընդդիմություն լինելը, նոր Հայաստանում մենք մերժում ենք այդպիսի ընդդիմությունը: Երբ որ իշխանությունը գող և թալանչի չէ, նրան քննադատելու բառամթերքն էլ պետք է այլ լինի»:
Մարուքյանն ընդգծեց. «Հիմա «սևն ու սպիտակը» փորձում է անել ՀՀԿ-ն, ասում է՝ մենք ենք «սևը», և ուզում է ձայների 30 տոկոսը տանել: Սևը վատ գույն չէ, բայց իրենք անգամ «սև» էլ չեն: Հիմա ժողովուրդը Հանրապետականին ցույց կտա իր տեղը»:
Մանրամասները՝ տեսանյութում: